【詹sir驗Grand Yoho】風吹房窗殼或會漏水 「呢個盤低咗幾分!」

更新時間 (HKT): 2017.04.11 12:57

新地(016)入伙盤一個接一個,今次驗收到元朗Grand Yoho,資深驗樓師詹濟南「詹sir」驗收一個10座中層單位,成交價逾千萬元。一戶收樓,八方知會,業主幾個whatsapp谷友匯聚單位,有街坊坦言「蛇王」等睇詹sir驗樓,恐防有咩甩漏。結果搞到小鳳姐出場,主人房窗戶漏風,放塊紙巾睇見「吹呀吹讓這風吹!」,詹sir話問題影響大,「漏得風就漏得水」,打風時,水會唧入房。

詹sir驗收元朗Grand Yoho10座中層戶,實用702方呎,三房間隔,業主是換樓客,去年9月以1,067萬元買入。新地收樓部職員見到詹sir殺到都嚴陣以待,全程傍住,不過詹sir懶理,照舊篤出問題,「地板一處踩落發聲,玻璃崩花一處,空心磚一塊,細房一邊牆的油漆透底……

不過問題最大是主人房窗戶,走進主人房,窗已關,詹sir拎張紙巾放在窗邊,紙巾竟然吹起,詹sir指出:「漏得風,就漏得水,打風時,水會唧入來」,這個問題影響好大,其實是窗鎖裝歪造成,奈何窗戶由工廠整個運來裝潢,應該一時走漏眼,其實將個窗較返貼就可以解決問題。

佢好公道咁講,單位好多地方手工不俗,多項工種滿分,包括石材、批盪、門、櫃、來去水、潔具、家電、假天花、整潔度等,惟不少瑕疵,最後得分92。詹sir不諱言,新地過去新盤交樓評分「好高好高分!」,整體評由85至97分,個別單位低於90分,但大多數是「9」字頭,歷來最高分是大角嘴瓏璽,評分99分。至於今次Grand Yoho,他認為,近年建築工人缺乏,整體質素下降中,「呢個盤(Grand Yoho)其實低咗幾分。」

關心你飯碗,貼近你生活,即Like「蘋果ATM」FB專頁!
BannerBanner