【甲醛疑雲】光觸媒、種蘆葦真能清甲醛嗎?

更新時間 (HKT): 2017.07.28 16:12

坊間清除甲醛方法多多,包括竹炭、植物,以至花數百或數千元幫襯光觸媒。理工大學屋宇設備工程學系副教授梅國威認為,植物效能成疑,而且只要讓單位保持長期通風,普遍兩至三星期可讓甲醛於空氣中稀釋,光觸媒「整來做乜」。

梅教授指出,光觸媒或噴藥水,假設用在牆上,髹上含甲醛油漆,使用藥水阻止甲醛揮發或透過化學作用把它分解,理論上是對的,「但是你個單位,兩三個禮拜後,甲醛都會稀釋,無哂,咁整來做乜啫!」

他補充:「假設傢俬含甲醛,噴完藥水後如何呢?會閂埋,咩叫光觸煤,要接觸陽光,你閂埋,點見陽光呢。呢個科技係啱,係好,如果空氣中有呢樣嘢,如果透過呢個方法可以令甲醛分解,但要有光先得㗎。有陽光,係有用,藥水把甲醛分解,呢個我Buy嘅。」

他續稱:「不過如果單位能夠通風,甲醛自然流失,噴來把鬼咩!如果櫃含甲醛,噴藥水到櫃內,但無光,又有何用呢?喂!又話buy?係,如果傢俬面有甲醛,噴藥水落去,真是有反應,分解甲醛,係呢個情況下係work嘅。問題係,你用光觸媒嘅用料會自然添加嗎?唔會,好似汽車打蠟,打完一次,個蠟係咪呢世係度先,係咪永遠係咁先。所以跟住佢(呢啲公司)會叫你再做,(咁咪要經常噴?)我嘅理論就是,究竟傢俬係咪經常釋放甲醛先?噴完,解決咗一次,心安理得,當俾錢買心理醫生,安心啲。我唔可以扼殺光觸媒的作用,但要懂得使用。」其實最重要知道甲醛何來,裝修前盡量避免使用含甲醛傢俬。

至於植物,包括吊蘭、虎尾蘭、蘆薈是否清除甲醛,他回應:「科學上,的確是吸甲醛,問題是一棵吸得幾多呢?效果唔係咁明顯,需要一定數量先吸到。理論上是做到,但唔可以用work呢個字,只能說有此特點,但要記住,你放幾多棵先,正如唔能夠用一個鬚刨仔size吸塵機去吸全屋啲野,唔make sense。」

記者:陳家雄 陳家恩

關心你飯碗,貼近你生活,即Like「蘋果ATM」FB專頁!
BannerBanner