【沙士15年】鏞記:03難敵沙士 今天難敵租金

更新時間 (HKT): 2018.04.08 00:05

於中環經營超過半個世紀的鏞記酒家,曾經歷過二戰、禽流感、沙士等天災人禍,掌舵人「二少」甘琨禮(禮哥)向本報細數沙士經歷:「話難過難過,但都只係三個幾月,過完就覺得好似過得好快,但當時感覺,真係好漫長。」

2002年尾,正是鏞記60周年紀念,禮哥憶述,父親甘穗煇當時仍在生,大搞「八仙賀壽」慶祝他90歲生辰,生意穩步上揚之際,怎料數月後遇上沙士,可說是大上大落。

「嗰時個個都唔知咩事,淨係識得洗手!」禮哥指當時整個香港謠言滿天飛:「每日都報走咗幾多人,幾多人留院、要隔離,每一個都好惶恐。」

由於當時若不幸有員工染上疫症,全店就要「封舖」消毒,所以每日開業都如臨大敵,「1比99高溫消毒碗筷、定時抹升降機制、每人有一對公筷,都係嗰陣時開始有,好多措施家都仲有實施。」

禮哥指,每樓層都有所屬經理,每日開店時,他們就需要為每一位員工量體溫,他更指,當時中環一到晚上就猶如死城:「遊客生意跌八成,燒鵝都賣少七成,嗰時真係見步行步。蘭桂坊簡直無人去。」

禮哥父親曾嘆息:「日本仔打到嚟嗰時,拉塊窗簾,出面無人知就繼續做生意,但家資訊發達,大家知得太多,反而無生意!」但他都提醒員工,疫症發生都要保持優質服務:「就算帶口罩,講嘢都要清清楚楚。」

鏞記亦有要求員工盡量放有薪假,幸好疫症爆發的時間不算太長,最終未至於要考慮減薪。到疫症結束,鏞記便密鑼緊鼓宣傳,好像送燒鵝、與其他食肆合作,生意不久得以回復。禮哥指,與行家更團結,是疫症的意外得着。

鏞記曾經歷多次天災橫禍,對生意各有不同的衝擊,但禮哥表示,現時飲食業的經營環境,比15年還要差:「而家租金、人工、原材料都貴,成個香港消費模式都改變,鮑參翅肚銷路跌咗,同埋近年海洋受污染,海產供應更加少、品質亦差咗,家禽利潤都降低,真係無辦法!」

記者:梁延宇

關心你飯碗,貼近你生活,即Like「蘋果ATM」FB專頁!
BannerBanner