【富二代起動】郭少明囝搞房地產基金 「住宅見頂工廈有水位」

更新時間 (HKT): 2018.09.17 00:30
莎莎太子郭浩泉(左1)夥拍泛海國際主席馮兆滔兒子馮康(右2)、家族從事泰國地產業務的謝耀陞(右1)、宏基資本前副總裁洪英偉,成立房地產基金麒豐資本。
(蘋果日報)

莎莎(178)主席郭少明幼子郭浩泉夥拍富二代創辦房地產基金麒豐資本,成立8個月連掃2個工廈項目,總投資額約40億元,負責籌錢的他最終都獲父親郭少明注資以億元計,另外還包括傳老榕家族、「保齡球大王」楊氏家族、永利地產(864)等,現在目標是再投資50億元資產項目,但覺得住宅市場已見頂,工廈仍有水位賺。

今年6月才過26歲生日的郭浩泉從英國倫敦瑪麗王后大學修畢商業管理後回港,先後到物業顧問第一太平及豐泰地產工作,離開豐泰後接手家族地產業務,其中一個是銅鑼灣銀座式商廈V Point,「搞V point識咗Albert(馮康)同Wang(謝耀陞),傾好多層租務,尤其是共享空間,每周見兩、三次,跟住覺得大家都鍾意地產又啱傾,就搞咗間公司。」

於是今年2月郭夥泛海(129)主席馮兆滔兒子馮康、家族於泰國從事地產的謝耀陞及宏基資本(2288)前副總裁洪英偉創辦麒豐資本,其中謝耀陞話家族在泰國從事地產,亦投資本港物業市場,十多年前21歲時就幫屋企人在香港買舖。郭就認為:「自己一個家族做,資金唔係好誇張,唔可以好似新鴻基咁,但如果籌埋其他人嘅錢、力量同idea,咁個地產項目好好多!」

自立基金,負責籌錢,成功必須靠父幹,郭坦言有向父親郭少明籌錢:「有,但佢無即刻應承……(有無sell佢?)sell佢唔到……」於是和拍檔帶他實地視察,最終父親郭少明都注資入基金,郭浩泉稱:「佢鍾意觀塘榮興利工廈項目,因為真是好近前九巴車廠,近得新鴻基咁大型嘅project,都ok啦!」當時有份落嘴頭的拍檔洪英偉補充:「呢個項目地價先五千零蚊,郭生都好醒㗎嘛!」結果基金第一擊就以約6億元購入觀塘榮興利工廈,該該目還游說了「保齡球大王」楊氏家族、永利地產(864)等投資者注資,將會補地價重建為商廈。

郭浩泉不諱言籌錢時碰到一面灰,「好negative嘅感覺又真係無,咁好正常嘅,你要人俾錢……覺得無問題囉,只會話下次做好啲。而家通常有咗個項目,再去游說投資者,如果係籌唔夠數,我哋都唔會冒險。」他認為,本港住宅物業市場見頂,工廈尚餘水位,資金都會較注重工商市場。

洪英偉補充:「投資者可能睇中我哋年輕、有創意。而且我哋同出面基金唔同,唔係淨係用外面錢,都有用自己錢。我哋唔會假設第日個市向上,例如而家賣萬五蚊,目標賣兩萬,唔係咁諗。而係起完出來一萬蚊,如金融海嘯殺到,會唔會跌到成本價呢?我哋守唔守?呢啲最睇重。短期市況唔太著重,聽日恒指跌定升,唔係好擔憂,我哋投資睇5年,計啱價先做。」基金涉獵任何類型物業,香港暫時集中重建項目,海外市場亦會關注。另外,會競投規模較細、目標價20億元內的官地。

記者:陳家雄

關心你飯碗,貼近你生活,即Like「蘋果ATM」FB專頁!
BannerBanner