【專訪】葉氏化工太子爺:唔諗新嘢企業會滅亡

更新時間 (HKT): 2018.10.02 00:00

十年樹木,百年樹人,成就一間企業又要多少年?成立至今47年的葉氏化工(408)率先訂下「百年葉氏」的目標,最近更動作多多,既收購駱駝漆,又入股大嘜養車,一字記之曰就是變,葉氏企業發展總裁兼太子爺葉鈞更表示,「就算冇百年葉氏呢個口號,唔去諗新嘢都會滅亡,生意停滯不前係死路一條。」

葉氏化工是傳統工業股,四大業務包括溶劑、塗料、油墨和潤滑油,收購駱駝漆壯大塗料業務不難理解,但「無情情」入股大嘜養車幫汽車換油未免令人意外,葉鈞直言背後不止換油、賣潤滑油如此簡單,「一間舖成熟的話,服務一個小區有超過3000個客嘅數據,有車種、車油、消費能力,可以由此諗點發展車嘅其他產品,並且係現時葉氏冇推出。」「先有客,再諗發展咩產品,會比較容易。」

葉鈞推算,直至明年底將有約20萬的客戶數據,屆時便可針對地區、客戶對產品需求而推促銷;而他的心思不止於此,他希望由「車」開始,再往「家」的方向推進。「多數車主都係業主,有車就有樓。」「換油要30分鐘,呢段時間坐喺到,會唔會可以再諗吓,例如隔籬放家中清潔劑呢類產品?」

葉氏化工以2152萬元(人民幣.下同)入股大嘜養車27.8%股權,目前在全國有30間分店,主要集中在大灣區,目標在3年後達到1000間,其中廣東佔300間。要高速發展,就要靠「加盟」,現時加盟資金為50萬元,目前分店約9個月回本。「短期內做支援角色,因為唔係大股東,當投資startup(初創企業),唔排除控股。」

千方百計創新,皆因工業產品競爭太激烈,想達到「百年葉氏」就要諗計。「就算高市佔率,話語權都唔係絕對,唔可以輕易加價,而且利潤率有個頂,國內有啲土炮公司,好難完全擊倒。」歸根究底,最後的解決方法,只有三條路,「生產有咁低成本就咁低,有規模效應,溶劑業務就體現到,人地最死,我都仲有錢賺;再唔係係投入好多技術,研發得你有人哋冇,任你叫價;最後就係品牌。」技術一直有投放,但最快見效就是品牌,從市場、消費者著手,買駱駝漆、入股大嘜養車就是要營造品牌。

「成立接近50年,董事會好明顯想做落去,要做長遠生意。呢刻乜都唔做,競爭只會愈嚟愈激烈,產品又冇特別,品牌又冇乜特別,成本唔算特別平,遲早有人追上。」

記者:張俊浩

關心你飯碗,貼近你生活,即Like「蘋果ATM」FB專頁!
BannerBanner