【施政報告】市民批填海嘥錢 空姐︰「填返來俾咩人住?新香港人囉!」

更新時間 (HKT): 2018.10.10 17:38

對於施政報告提出房屋措施,當中提出填海,做空姐的楊小姐表示︰「梗系唔贊成啦,佢填返來嘅海俾咩人住先得架,每日話就話150個單程證落來,我就唔信,暗啞底可能有好多不斷落來,跟住就申請公屋,咁又有咩用啫,都唔係俾香港人住,應該咁講,俾新香港人囉!」她又稱,填海要5000億元,唔出奇,高鐵用左幾錢啫,即是倒錢落海囉!咪又係嘥錢。而家提供措施好空泛,好多未必真係做到。

對樓價方面,她認為有少少影響,「目前中美貿易戰,唔係短時間,呢個戰維持好耐。而家樓價對於真正香港人來講,都係買唔起。」她坦言未買樓,「邊有錢買樓,而家樓價無跌番3、4成,唔係一般基層可以買到,而短時間亦唔會跌3、4成。(上車無望?)無望架,又申請唔到公屋。今次施政報告未真正感受到切身有益於我。」

另一名市民邱先生表示,除左填海,仲有好多其他方法,例如發展粉嶺高爾夫球場地皮或棕地,「可否聽下市民意見,係支持定反對填海呢?填海,填返來有幾多公屋,花成5000億元,差唔多一半香港儲備,隨時好似高鐵咁超支,值唔值得拿哂大部份儲備去做,有賭博成份。而家公屋供應增多,排緊公屋嘅有幾多係香港人,大陸人南亞人比例如何,多咗供應係咪俾香港人,好多香港人打份工已經超出公屋入息上限,變左係咪真正惠及香港人成為疑問。今次施政報告,唔好話上車,保障都有疑問,如果100分,會評10分。」

記者︰陳家雄

關心你飯碗,貼近你生活,即Like「蘋果ATM」FB專頁!
BannerBanner