【職場慧眼】工程界顛倒黑白點算好?(張慧敏)

更新時間 (HKT): 2019.03.12 15:00

「Son姐你好!想分享一下在下近期工作的難處,希望得到你指點。謝謝。相信son姐都會留意到近日工程界醜聞,作為這個行業的最低層就越來越感到大壓力同不公。人手唔夠,一個人一天要check十萬樣嘢,樣樣最後都叫你簽,簽完有事就係你上身。有時質量無文件要求的水準,上級都會用盡方法話你的看法有問題,然後焗你簽名,廢事影響工程進度。上級永遠用口術,叫佢出email就發神經,天天都都是同上級的拉鋸,越努力認真做就越得罪人。但我真係唔想是是但但的就簽form,就算唔係驚有日要上身,都覺得hea住做唔好。

「香港點解變成咁?是非不分指鹿為馬顛倒黑白,總是黑狗得食白狗當災!唔想咁樣可以點?搵食艱難,不是心口掛個勇字出去博一博,話唔做就唔做咁容易。況且天下烏鴉一樣黑,一丘之貉蛇鼠一鍋,真正跳入黃河都洗唔淸,如何可以獨善其身?」

以上這些問題我問了我自己不曉得多少次!答案是喜歡不喜歡也好,必須要接受我們無法改變得了現狀的事實,我們有的只是抉擇取捨的權利。

過不了自己良心那一關,忍無可忍,就寧願搵少啲都出去搵份新工。如果份工不管基於什麼理由也好,你一定要保住是不容有失的,除了忍氣吞聲就範,只能求神拜佛只求多福希望過到骨。

我就是因為忍無可忍,迫自己赤手空拳打天下,講起來其實一樣辛苦痛苦,當中的辛酸忐忑徬徨不足為外人道。但一想到即使死都死得轟轟烈烈,對得住自己對得住天地良心,幾辛苦都值得,幾艱難都要撐住。所謂好堅強,其實一切都是被迫出來的!

鬼叫我哋人微言輕等錢開飯咩!大家拍着頂硬上啦!

關心你飯碗,貼近你生活,即Like「蘋果ATM」FB專頁!
BannerBanner