太子爺棄百萬年薪 幫父親改革
平安包老店追上潮流

更新時間 (HKT): 2019.05.11 02:20

【周末專題】香港地租金太高,人情味太少,「老字號」的生存空間日漸縮窄,屹立長洲40多年的郭錦記,十年前憑「太平清醮」出產平安包而為人所認識,短短數日內賣出逾6萬個平安包,惟單靠街坊生意難以繼續生存。今年68歲的老闆郭錦全,雙膝剛動了手術,一直萌生退休念頭,原想過光榮結業,將這個長洲老字號塵封下去,儘管長子郭宇鈿Martin想繼承衣鉢,但遭其反對。幾經掙扎,兩年多前Martin先斬後奏,辭去金融主管職位,放棄百萬年薪,由中環返回長洲,由辦公室踩入餅店,Martin娓娓道來這兩年如何面對老店褪色、師傅質疑以及老父不認同等挑戰。
記者:陳新政

我係Martin,今年37歲,畢業後做金融行業十幾年,6、7年前爸爸已經話想退休,我一直同佢商討,想返嚟接手間舖頭,但佢都唔同意,唔想我入行,因為爸爸覺得做金融收入唔錯,做包整餅收入低又辛苦。但我覺得郭錦記就好似未打磨嘅鑽石,爸爸佢喺礦山開探出來,但佢老啦,我有責任、情意結,將粒石打磨,將舖頭做落去。

今年推蜘蛛俠平安包

我係郭錦全,今年68歲,郭錦記就係我個名改出嚟,一做就做咗40幾年,最初做花生糖,之後整平安包,養大咗間舖頭同屋企人。長洲有4間老字號因為冇下一代接手,關晒門啦,我幾年前開始諗退休,諗住喺太平清醮嗰三日,每日免費派5,000個平安包畀街坊,同大家講我光榮結業,點知個仔話返嚟幫手。其實我係反對嘅,因為太辛苦啦,佢做金融份工收入仲高啦,星期六日仲可以有家庭樂,好過日日都喺舖頭做嘢,幾辛苦呀!

「阿仔做得幾OK」

難聽啲講,佢唔做我仲開心,因為我唔使跟頭跟尾,平時有活動,我都同太太落去幫手。佢經驗又唔夠,同埋最困難係請員工做餅,因為冇人肯入行做,不過自從阿仔返嚟,我哋溝通都多咗,佢除咗經驗唔夠,同啲大公司合作嘅方法都幾好。我係潮州人,好少讚啲仔女,但我見阿仔現在都做得幾OK嘅,希望佢可以將郭錦記發揚光大啦。

關心你飯碗,貼近你生活,即Like「蘋果ATM」FB專頁!
BannerBanner