Ztore創辦人撐修例捱批 員工fb補鑊:你老闆,我唔同意!

更新時間 (HKT): 2019.06.14 21:55

警方於6月12日在金鐘使用橡膠彈、催淚煙等武器暴力驅趕在場人士,有金鐘小店支持年青人,更有三名居港外國人免費派熱狗支持;不過並非每個商戶都「反送中」,一向打本土品牌的網購商Ztore士多其中一位創辦人,中山政協委員凌俊傑Clarence Ling日前就在facebook上出post支持《逃犯條例》,他指出「修例,其實係冇問題嘅」、「你哋估吓如果唔通過修例,香港會變成點?」數千網民及顧客其後在Ztore的fb留言鬧爆,並揚言要杯葛及罷買Ztore,Ztore的fb小編於今日出post「補鑊」,表示,「三位老闆、所有員工持不同意見」但網民明顯不收貨,逾五千留言抵制該店。Ztore的fb專頁Like數,在一夜之間減少近3萬個like。

Ztore於2015年由3人創立,分別為今次支持「送中」的凌俊傑、岑廸贊以及梁子琦,憑本土老字號故事、社交媒體宣傳起步,幾年間令「士多」在香港網購市場佔一席位,更於18年10月,於B輪融資籌得6,200萬港元(800萬美元),微光創投(Welight Capital)領投,桂洪集團跟投,領投的微光創投,來頭不少。創辦人包括騰訊的前電商CEO等,微光創投亦有投資港產旅行服務預訂平台Klook,以及多間內地B2C平台。Ztore累計融資超過1.5億港元。

根據中華總商會資料顯示,凌俊傑為桂洪地產董事,公職包括有中山市12屆政協委員、中華全國青年聯合會委員、香港菁英會副主席、香港福建社團聯會常務會董兼副秘書長、中山市海外聯誼會理事、接力中國青年精英協會理事等等。

凌俊傑於fb出post,認為修例有助香港發展,他表示:「修例,其實係冇問題嘅,亦跟足UN指引做,美國亦有向中國移交逃犯,只不過叫Deportation而唔係Extradition。」他又指:「其實我諗大家都知一國兩制嘅成功對於國家嚟講係幾咁重要,可以試諗吓,如果修例後內地政府真係濫用呢個權力嘅話,對於國家統一係完全冇幫助,亦代表一國兩制失敗。」

其後Ztore於fb再出post補鑊,表示「喺士多,我哋每個人都可以用各自嘅方法去表達自己睇法。支持、反對、無意見嘅,都一直喺士多內共存。三個老闆之間、伙計之間,各有自己睇法,沒有誰怕誰,誰follow誰。因此,今日我哋可以大大聲同呢個老闆講:你係出糧俾我,但你嘅睇法唔代表我,亦唔代表士多。士多同香港一樣,沒有單一,只有多元。」

但網民明顯不收貨,並表示,假若凌俊傑不退股,便會繼續罷買。有多名網民貼上過往在Ztore購物的記錄,證明自己是長期客人,並對Ztore的取態感到失望:「又話本土牌子,但又送中!」、「點講都救唔番,勸你哋集體辭職啦」、「出個咁嘅post 諗住洗返白,當香港人XX?」

關心你飯碗,貼近你生活,即Like「蘋果ATM」FB專頁!
BannerBanner