【蘋果驗樓】啟德新盤天寰蟲蝨大爆發 冷氣機嘔水柱48分不合格

更新時間 (HKT): 2019.06.27 06:00

90後護士阿峰與太太以約740萬元買入啟德天寰兩房單位,開住冷氣接受《蘋果》訪問才10多分鐘,客廳冷氣機滴水,竟滴出水柱。不單如此,客廳牆角驚現蜘蛛網並附送蜘蛛乙隻,廁所洗手盆櫃內一陣噏味,印象差,自評五、六十分。

資深驗樓師詹濟南徒弟陳智康「康仔」打開洗手盆櫃發霉生口木板,即場加演「變變變生命力之蟲蝨覓食篇」,一堆蟲蝨四圍走,眾人呆望擘大口。最終驗樓得分48分,屬於不合格,低於業主預期,業主說:「希望發展商執完會收貨」。

今年28歲的阿峰是護士,多年來算儲到一點錢,「但你要時間儲,我哋做咗七、八年工作,儲到差唔多100萬元。驚自己儲嘅錢追唔到樓價,擔心將來會唔會用好多錢先上到車。」

當時經紀介紹啟德天寰,「睇好啟德,新發展區,交通方便」,揀樓全家總動員,手執100多號籌,「到我個陣,啱預算目標單位得返五、六個。最平個啲一早有人揀咗,始終係最平。當時我目標2房, 7字頭都係預算之內,如果超出咗,我都同屋企人講,過咗唔買㗎啦!就算經紀游說都唔會,因為最擔心之後壓力測試過唔到,銀行唔批俾你,辛苦儲返來嘅錢會撻定。」

他續稱:「揀同等嘅時間好緊張,你唔會預計到幾時到你,亦都未必到你,未必有你份,到有你份都未必有你啱心水嘅單位。我係有啲幸運,可能太太畀到運氣我,第1次買樓,第1次抽新樓,就已經抽中咗啦!」最終父母資助三分一首期,以約740萬元買入天寰兩房單位,實用432呎。

作為置業初哥,事前刨足新盤銷售細節、又向銀行做按揭預批,講足十多分鐘,突然傳來滴滴答答聲,阿峰背後客廳冷氣機在滴水,滴出一條水柱。他已備膠桶載水,「收樓當日,冷氣機開咗10分鐘,係房聽到點解滴滴答答聲,原來冷氣機有條水柱滴落嚟,滴到地板,長流㗎喎,唔會停。滴到成地濕晒,即刻熄咗佢,但熄咗都滴咗好耐下,抹咗好多次先乾晒。當時咪熄咗佢囉!冷氣機唔係好大問題,應該可以執修,最緊要唔係結構性問題。」

單位還有一些地方令他不滿意,「廁所洗手盆個櫃,打開就好大陣噏味,見到有啲位發霉,應該單位擺咗一段時間都無人理過。見到牆角有蜘蛛網,臨交樓前都無人執過,唔知點解最後無清潔一次。我又覺得唔會好負面,相信發展商會執修,始終係佢第一個大型住宅項目,應該會好重視。」

隨後康仔入屋,直指:「冷氣機滴水,主要因為去水喉塞咗,啲水去唔切就滴返落來,而呢個單位位處極低層,有機會去水喉下面有少少石仔塞住。暫時見到屋苑有2個單位冷氣機去水喉都出現咁嘅情況,不過呢個單位最嚴重。」另一個業主關心的問題是洗手盆櫃,康仔二話不說,打開櫃門,已見生口板發黑,徒手拎起,板底與邊滿佈霉菌與蟲蝨,有理由相信是以霉菌為主食的卜泥四圍走,鏡頭聚焦細看,看到疑似蜘蛛仔捕捉蟲蝨裹腹。打開浴室假天花,康仔指出一條熱水喉管包膠未做足,「最好包返,如果唔係倒汗水會滴落來。」

開放式廚房鋅盆水龍頭與枱面接駁位有罅隙,潑水測試,水由罅滴落櫃底。再試洗衣機去水喉,放水後竟見喉管「嘔」水,漏得嚴重。單位房間玻璃窗崩裂需要更換,工作平台又有多塊空心磚。全屋15項工種,4項捧蛋,包括來去水、鋪磚、冷氣機及整潔,總分48分,屬於不合格。康仔稱:「驗咗天寰十幾個單位,評分由六、七十分,這個單位比較差,算是暫時項目新低分。」阿峰聽完評分後回應:「其實我原本都是預計五、六十分,而家再低少少。而家唔收貨,希望發展商執完會收貨。」

負責天寰的誠穎投資發言人表示,發展商在收到相關執漏清單後,立即要求承建商跟進執漏事宜,並全數完成相關執修工程,並將盡快聯絡業主安排驗收事宜。

關心你飯碗,貼近你生活,即Like「蘋果ATM」FB專頁!
BannerBanner