【BizStarter】「雙失中佬」做男網紅翻身!直播賣女裝鞋 兩日沽清1600對

更新時間 (HKT): 2019.06.30 06:00

今次不是會考零分創業系列,主角陳胤華(Jaguar)成績好點,當年考得1分,畢業後擔任女裝鞋推銷員,憑其三吋不爛之舌成為Top Sales,「我一句你着對鞋幾靚喎Miss,佢哋相信我多過信女同事。」之後「升呢」做批發,03年再北上開店,高峯期有8間分店,年賺兩百萬。好景不常,淘寶等網購平台殺到,打殘一眾小店。生意失敗,打工卻遇公司執笠又失業,真正「雙失中佬」。直至兩年前,hea夠唞夠,他決定要重操故業賣女裝鞋,賣掉內地物業,拿着100萬開設網站女鞋國。憑每周開FB Live賣女裝高踭鞋,令此名已37歲的「中佬」,意外成為男網紅,直播人數過千,累積收視過萬,高峯期兩日內賣出逾1,600對鞋。

由高峯墜谷底 八間舖五年執晒

男士做網上直播推銷女裝鞋,看似匪夷所思,但Jaguar這個活生生的例子推翻一切認知,「當初我去見工時都唔知係賣女裝鞋,但返工後發現,啲女士聽我講嘢多過其他女同事,佢哋覺得男人讚好睇,會受落好多。」兩個月後便成為公司Top Sales,獲行家賞識,加入批發團隊,之後跟表哥北上,在汕頭開鞋店,2003年網購未盛行,中低檔價錢的女裝鞋像印鈔般賺錢:「每一年都賺到200萬,只係一間舖,之後梗係推落去,再開分店啦。」高峯期,開設四間自營店,另外四間加盟店,更投資開設山寨廠。五年後,淘寶殺到,但他仍然深信顧客要現場試鞋,拒絕開網店,更將舖頭死守,「我當時唔信邪,又覺得賣鞋嘅網店冇得做,你唔落舖試對鞋又點知啱唔啱着?」結果生意一落千丈,頭一年生意額跌三成,第二年加盟店退出,「去到第三年我同佢鬥氣,捱到第四年結果四間自營店都執晒。」

在垂死爭扎的邊緣,他接到一個上海大客,一位網紅訂造4,000對鞋,「心諗不得了,即刻開機造鞋,當時興奮沖昏頭腦,冇諗過自己條件符唔符合人哋標準,好自信滿滿咁交貨,點知QC(質檢)人員落嚟查貨,佢話『左右腳踭相差2mm唔得,絹布有陰陽色唔得,膠水滲出唔得,鞋底污糟唔得!』佢講咗好幾句唔得後,我問佢究竟仲有咩得,佢答我,『好老實,冇一樣得!』,喺嗰一刻,好似行雷劈落個頭到,我想死咁滯。」因為該張合約寫明,要45日內交貨,每對鞋價值399元,即該批貨總值160萬,「因為佢啲鞋預售晒,交唔到貨我要賠160萬,我即晚訂咗翌日機票飛上海,再向老闆求救,佢就話見我對鞋有認識,再找我做採購,只要我放棄手上所有事業,我梗係應承啦,佢就即場係我面前撕爛份合約!」加入網紅公司,猶如走進新國度,他見證網紅在內地的威力有多強大,最誇張有一位網紅,在14秒內便造出800萬元生意額,令他由鄙視轉成拜服網購,為日後成為男網紅埋下伏筆。

曾經失意 賣老婆層樓再創業

工作近一年,其後因網紅公司內部改組,他又變回無業遊民,回港Hea足8個月,「屋企人冇迫我搵工,我就日日釣魚,後來發覺要再博一次,就問老婆可否賣咗深圳層樓,當借100萬畀我去再創業,如果都失敗,我就做地盤都要養起頭家。」

Jaguar再做女裝鞋生意,不過今時不同往日。他由最初鄙視網購,到拜服網購,皆因見證過內地網紅發威,在14秒內達成800萬收入。上次網紅訂單令他上了一課,於是由以往做平價貨,轉為中高質貨,「例如我鞋中係用意大利料,企上去四平八穩嘅。」現時一對高踭鞋售賣500至700元不等,而且不會用其他途徑推銷產品,只會在直播中介紹鞋款,開業初期,第三個月只賣出24對鞋,下個月增至120對,第五個月賣300多對,直到最近高峯期,一個直播在兩日內便賣出1,600對鞋。

曾兩日賣1,600對鞋 目標月銷6,000對

走入女鞋國位於荔枝角的辦公室,擺滿數百個鞋盒,訪問當日已有過百對鞋包裝好準備出貨,跟Jaguar傾談數句,他便Sales上身,言談間不經意地推銷,又詳細介紹女裝鞋的重點及知識,滔滔不絕,難怪他能成為賣高踭鞋的男網紅,「大家都叫我鞋佬,我每星期五晚都會開Live,即場介紹啲新貨,48小時內係售賣黃金期,其餘日子我係唔使Sell嘢的。試過有女網友話叫我快啲介紹對鞋,話因為老公就快返到屋企,會唔畀佢買鞋!」目前生意穩定上升,但盈利遠遠未追上當年北上的風光年代,他計過數,只要能月銷6,000對鞋:「我就可以買返層樓畀老婆,對佢有個交代啦!」

記者:陳新政

關心你飯碗,貼近你生活,即Like「蘋果ATM」FB專頁!
BannerBanner