【李華華Online】朱沃裕失配偶權益 金利豐朱太:我同老公關係好好

更新時間 (HKT): 2019.10.29 22:07
「殼后」朱李月華上年同老公朱沃裕慶祝結婚35周年(互聯網)

金利豐(1031)行政總裁、「殼后」朱李月華上年為咗慶祝同老公朱沃裕結婚35周年,豪請好友齊齊飛往韓國濟州搞party慶祝,成為財金界熱話。點知事隔一年,披露權益居然顯示朱沃裕於上周四(24日)失去咗「配偶權益」嘅身份,唔再持有任何金利豐股份,莫非呢對本港金融界「金童玉女」感情生變?

咁震撼嘅新聞,朱太一聽見即刻同華華澄清話:「我同老公關係好好,一切無變!」佢話,金利豐一向都由佢個人持有,老公一向「零」持股,唔知聯交所點解突然出個咁惹人誤會嘅披露,佢都要同伙計了解下。佢強調,朱生會繼續擔任金利豐主席兼執董,總之一切不變。

一般嚟講,上市公司控股股東嘅配偶,會因為「配偶權益」被視作共同擁有上市公司嘅持股,並需要向聯交所申報披露。查實今次朱生嘅股權有變,或者同金利豐控股公司重組有關。話說朱太原本透過四間公司持有金利豐,但上周四佢就將控股公司「四合一」,統一由Active Dynamic Limited持有朱太嘅金利豐所有股權。朱太話,為咗方便申報,一直都有計劃咁做,只係之前太忙冇做到,重組唔涉及任何融資計劃,亦冇打算做任何股權轉讓嘅動作。都係果句,一切不變!

朱太同老公喺金融界出晒名係恩愛夫妻檔,兩人由美國打拚到香港,齊齊創立金利豐。作風高調嘅朱太一向係金利豐生招牌,但實際背後運籌帷幄嘅軍師卻是朱沃裕。雖然朱太話近排生意淡薄咗啲,但兩夫妻經歷咗咁多,外面就算風大雨大,兩人都打風都打唔甩啦!

關心你飯碗,貼近你生活,即Like「蘋果ATM」FB專頁!
BannerBanner