【經濟數據】政治因素致衰退 關焯照︰聽日搞掂啲訴求就無事囉!

更新時間 (HKT): 2019.10.31 23:26

【新增影片】香港連續兩季負增長,正式陷入技術性衰退,冠域商業及經濟研究中心主任關焯照認為,第三季GDP按年-2.9%,跌幅較他預期為高,而經濟變差明顯由零售收縮帶動,當中的私人開支跌幅為-3.5%,較GDP跌幅更大。

「香港係消費主導,要有啲措施谷消費,唔係搞果啲中小企,搞啲無謂嘢,中小企無單就無單,就算搞中小企,都係搞內部消費。」他建議政府可以派錢谷消費,推行減價購物日等運動,推動本地消費。

他批評政府持續以安全理由封港鐵或提早收車,對食肆晚市影響很大,「封地鐵係政治選擇啦,當為半宵禁做法,呢個係結構性問題,其實政府覺得安全嘅,地鐵正常返佢我覺得無問題。」

他預期示威局勢慢慢緩和,第四季的GDP跌勢會減慢,按季收縮可能低於1%,按年就跌1至2%,但全年香港經濟表現就「跌硬」,有機會跌1%。問及香港經濟是否將持續衰退?他回應說,「衰退尾聲都得㗎,聽日搞掂啲訴求就無事囉,等於沙士,疫情一受控,經濟就彈。依家係一個政治問題,要有政治嘅解決方法,呢樣嘢要做一個禮拜就搞掂!但坐係度唔解決,就大家攬住一齊死囉!攬炒囉!問題好簡單,任何人都知答案,係政府唔肯做啫嘛!」

中大劉佐德全球經濟及金融研究所常務所長莊太量此心認為,香港雖然技術上衰退,但留意財政司司長陳茂波曾指,只是連續兩季GDP負數,未有指按年都是負數,他估計全年或可保持正增長。

「第三季就係差,第四季就有望好返少少,因為10、11、12月如無咩大規模遊行,可能間中會有示威,規模比較細的話,旅客數跌勢如果穩定咗,甚至有反彈,情況相信會好轉,始終臨近聖誕假期。」

他覺得要用平常心看待這次經濟增長出現負數,就像2003年沙士時,一下子無旅客,但大跌之後,跌幅就不會再擴大,「最緊要大家睇一睇個失業率,如果大家份工都仲係度嘅,基本上經濟有啲下滑,我哋都未必感受到。」

持續示威令旅客大跌四成,但目前受影響的範圍未算廣泛,主要集中在飲食及零售,暫時又未見大規模裁員消息,「示威係純粹影響食肆、零售,其實影響唔到幾多GDP,但旅客唔黎令投資都唔黎,呢個影響就更大。」他建議政府如果要救亡,應該仿傚李嘉誠針對性援助,而不是藥石亂投,「巴士公司你又畀,點解要補貼佢哋燃油呢?好多大公司其實無必要資助,應該只係畀中小企,可能係受到社會事件比較大嘅餐飲行業。」

中大商學院高級講師李兆波早前預料,技術性衰退算溫和,因為香港比較特別,是人為因素造成,「好多嘢都係政府處理啲事,一路每步都錯,到依家搞成咁樣」,若撇除了本地因素,香港經濟很快會出現反彈,但若社會事件持續,經濟出現負增長的情況亦會持續。

李兆波認為市民不敢外出消費,投資意欲停滯不前,以及旅客數字放緩才導致技術性衰退,相反外圍方面,「美國嗰邊唔係話差,內地經濟放緩都有6%,其他新興市場例如緬甸、柬埔寨,呢啲都有6點幾增長。」

記者 鍾耀恆

關心你飯碗,貼近你生活,即Like「蘋果ATM」FB專頁!
BannerBanner