【創業起義】點解警察夠膽攻打大學?(尹思哲)

更新時間 (HKT): 2019.11.12 16:00

呢兩日,警察開始進攻大學,首先封了學院,然後辱罵學生唔讀書,我真係好唔明點解。

唔明嘅原因,係因為香港嘅大專院校,向來為中國輸出唔少創科科技,佢哋站喺美中科技戰嘅前沿,係最愛國嘅力量之一,應該受到國家嘅保護,絕對無理由受到香港警察嘅攻打。

我嘅講法係有根有據,首先根據QS全球大學排名,香港在全球大學「100強」,就佔據了其中的五家,包括港大、中大、科大、城大以及理大,最強研究領域包括在中國被受推崇的人工智能及機械人科技,以至前途無可限量的醫療科技等領域。

香港大學界別一直好低調,尤其處身美中科技戰當中,基於學術中立,其實並無特別發聲,但要知道,佢地一直為中國科技界源源不絕輸出新力軍,我就即管舉幾個簡單例子。

首先,DJI汪滔同老師李澤湘教授,正正係來自科大,其次商湯科技創辦人湯曉鷗及徐立,亦係認識於中大教授學生,以至於後來國產自駕服務AutoX,創辦人蕭健雄教授也是科大畢業生,還有城大畢業生黄源浩,就創辦了3D傳感技術初創奧比中光。以上公司全部是科技獨角獸級別起跳,商湯同埋DJI更是獨步全球。

獨角獸以外,就算其他中國初創,香港畢業生身影亦無處不在。例如根據中國一智庫報告,深圳人工智能初創「100強」當中,至少有五分之一創辦人,也曾接受香港大學教育。可以大膽講句,中國有優良的創科硬件或龐大市場,但講到大學基礎研究,還是遠遠不及香港。

既然香港大學院校,一直為中國默默付出,貢獻良多,阿爺何解又要以怨報德呢?我唔係唔明。同前輩H講起,佢一句就「點醒」咗我。前輩做過唔同上市公司CEO,佢話:「嗰道理同公司併購一樣,無論你原本嗰班底,貢獻有幾大,能力有幾強,被收購之後點都係難逃被撤換嘅命運。」

聽完我就明晒,喺Startups嘅世界,至少有兩種唔同嘅收購,一種係買你成間公司,資產好牌照好還是品牌,總之係買個軀殼,另一種係買支團隊,係要啲人幫手做嘢。

對於中國而言,香港大專院校係買個招牌定還是需要人才?我本來唔敢肯定,但從香港警察肆無忌憚進攻嘅表象嚟講,答案相信係不言而喻。

尹思哲

關心你飯碗,貼近你生活,即Like「蘋果ATM」FB專頁!
BannerBanner