【收市閒情】「無國界醫生」絕情背後的絕望真相(千頌C)

更新時間 (HKT): 2019.11.19 21:37
無國界醫生周二終於派員入理大了解情況。
(蘋果日報)

香港出現人道災難,但「國際醫療人道救援組織」無國界醫生,對香港不單不聞不問,但講明經評估後,認為「香港醫療資源與救援能力都是充足」,於是決定,唔派人幫手(雖然喺退捐潮下,無國界醫生終於喺周二去理大幫手,但一切太遲了)。

說好的「人道救援組織」,見到人道需要,就話「你哋夠物資,唔使我。」其實,如果真係夠嘅,就唔會成日要用人鏈運鹽水入去,亦唔需要咁多義務First aid,而佢哋更加唔使俾人拉。

咁好啦,問題係點解無國界醫生咁驚呢?或者答案就喺《人民網》嘅一篇文度搵到,標題如下:《揭祕香港亂局幕後推手:「掛羊頭賣狗肉』的 NGO!》篇文就提到,「自今年3月份以來,香港本地約50 家、境外超過100家NGO組織先後在『反修例』期間參與亂港活動。」

嘩!有咁多間咩?官媒就好體貼嘅,當然有點名啦,帶何韻詩去國際演說嘅聯合國觀察、美國人權基金會當然係座上客,至於社聯、教堂亦都因提供休息、醫療而中箭;最慘烈嘅係紅十字會,因多次於示威現場設急救站、或開班教急救,都被指為「人道主義救援背後的『攬炒』勾當」,仲要全部FB Cap圖為證。

咁瘋狂嘅論調背後,其實反映緊中國已將打壓NGO一套手段,喺香港展開。

話說,《境外非政府組織境內活動管理法》(境外NGO法),早於2017年1月生效。你要喺中國運作,首先要搵政府部門作為主管單位作為你監管,搵唔到你就開唔到Office。同時,公安亦會對機構把關,每年續簽一次,你有咩差池,你成個Office就會GG。

好啦,咁點解我會話呢條係惡法呢,因為法例規定,境外機構「不得危害中國的國家統一、安全和民族團結,不得損害中國國家利益」,或「不得從事或者資助營利性活動、政治活動,不得非法從事或者資助宗教活動。」即係話,如果中國將活動定性係非法,任你嘅工作係出於人道立場,只要你出動,你以後喺中國都唔使指擬生存。

今次歷時5個月示威,傷者無數。作為人道組織,救人本來就係職責所在,見死不救沒有討論嘅餘地,但現實話畀我哋聽,國家機器已出動,更強迫救援機構,喺救同唔救之間二揀一:一係,你就好似紅十字會咁,救人,然後得罪中國被點名;一係,你就要好似無國界醫生咁,為自保而違背成立宗旨、人道主義袖手旁觀。呢一個,先係背後的真正人道災難。

呢個係今日嘅現實,亦都好可能係未來,你真係接受到一個咁嘅香港?

我接受唔到。

其實香港人多年來非常支持無國界醫生,單係2018年,年逾20萬活躍捐贈者,年收捐款5.18億。粗略計算,我假設呢20萬人每人月捐200蚊,一年就收4.9億,佔一年所有捐款近95%。即係話,無咗香港呢廿萬人,呢個機構會完全玩完?唔會,無國界醫生今次向外界展示「世界是中國的」,作為愛國NGO,又點會咁易玩完。

關心你飯碗,貼近你生活,即Like「蘋果ATM」FB專頁!
BannerBanner