【廣告經綸】浪費公帑做宣傳(文迪晞)

更新時間 (HKT): 2020.01.16 18:00
(社內相)

政府賣廣告,廣告費當然是來自公帑,這是常識吧。

然而,點先可以用得其所?首先,賣任何廣告,都要合時兼到位,但你看近幾個月的政府廣告,從「珍惜香港這個家」、「止暴制亂」、「與暴力割席」到近排的警察招募一套四款「如果你想守護香港」,統統都係時間、人物、地點錯晒。道理很簡單,你有冇見過,當國泰、匯豐、港鐵出咗事嘅時候,會唔會唱反調大賣廣告?傻嘅都唔會啦!因為只會事倍功半,越描越黑,弄巧反拙。廣告費,等如倒錢落海。

再者,廣告當然要講求創意、好的文宣、有影響力。你看這些政府廣告的弱雞文宣,加埋近乎「零design」,真係令人懷疑是否因為沒有廣告公司肯接政府job的關係,搞到質素咁差。

「與暴力割席」的宣傳片,以為要同年青人溝通,就要出YouTube、商業二台,廣告裏又要rap又要用黑白色強烈對比,咁就以為好In好年青,可以同年輕人溝通嗎?仲要大力標榜「年輕人追求自由,其實香港已經很自由」⋯⋯咁就出晒事,由始至終政府都不明白同一個道理:年青人要被說服,並唔係你講佢就信,賣廣告不能自說自話,明明一個沒有根據的理由,越講只有越唔信。

這兩天在紅隧港島入口,警察買咗塊好大的廣告牌,上面寫咗8個盲都睇到的大字「如果你想守護香港」,然後下面就話「請即投考」。訊息無疑好清晰,但bad taste到一個點,不但用了死人藍,而且沒有丁點設計,幾十萬的廣告費,同燒銀紙有何分別?

好的文宣,除了要有好的的文筆之餘,更需要好的內容,它要感人、與人相關、有啟發、有提升、有意想不到、有增值、有共鳴。要做好社會宣傳,其實真係唔係咁簡單,與其「平霸」洗腦式和「自high」式去亂做,不如虛心跟蔡英文偷吓師,睇佢點做social同用KOL去打動大班年青人啦!

關心你飯碗,貼近你生活,即Like「蘋果ATM」FB專頁!
BannerBanner