【Little Englander】美國人因武肺死有幾大鑊(孫柏文)

更新時間 (HKT): 2020.02.14 00:00

武肺喺英國似開始社區爆發。新聞報道啲新症時,已開始冇講點樣被傳染。離開香港後,其中最唔習慣嘅嘢就係睇當地傳媒報新聞時,因玩大量自我審查,要政治正確行先,公眾知情權行後。好多時係要留意冇報道嘅嘢,多過佢哋寫出來嘅嘢。

不過孫柏文問過啲喺英國唔同地方嘅香港人,都話未見有人戴口罩。而佢哋啲官繼續話戴口罩冇料到。

身在東倫敦嘅我,都係尋日下午,第一次見到有個細路仔放學時戴。佢阿媽似係黃種人,而佢就見唔到戴口罩,因為頸巾包到上鼻。

至於倫敦唐人街點?唔知,唔敢去。

睇對上一個禮拜英國傳媒報道,佢哋已唔再講例如:「平時流感都死好多人啦!」嘅說話。訪問啲官,亦唔會再學之前咁非常合作去粉飾太平,開始真係替觀眾開始插啲官做咗咩嘅準備。如果香港係一個月前嘅武漢,倫敦就係一個月前嘅香港。

至於花旗國傳媒。最領先嘅嗰批,例如網媒同財經傳媒,已數周大力推美國政府去查究竟武肺係咪嗰間P4實驗室洩露出來。而由大陸駐美大使,到美帝自己啲官,無一敢否認「P4實驗室洩露論」。

咁即刻點?花旗國最出名嘅財經記者/女主播Maria Bartiromo直接問:「如果武肺真係實驗室,以改RNA造出來。即刻中國研究緊Weapons of Mass Destruction(大殺傷力武器),生化武器。點解係都唔俾我哋CDC(美國疾病管制與預防中心)嘅人去查?」

我一聽到Weapons of Mass Destruction一詞,真係仿佛時光倒流到2003年咁。不但沙士世界,仲要好似臨界要打薩達姆嗰隻。

當然,呢種諗法會否滲透入美國主流民意,就只係用一個指標就知。花旗國將會有幾多人因武肺而死?如果真係好似梁卓偉教授,向英國《衛報》咁講,地球六至八成人接觸到,之後百分之一嘅死亡率。咁平均計,花旗國將會死大約兩百萬人。

如果係咁,我可以好肯定咁講,美國對中國嘅政策會變。

個半月前,我喺我另一專欄「金手指」推介過一齣叫《阿基米德之大戰》。一齣講當年日本海軍中,戰艦派同航母派爭budget起船嘅故事。

除咗因當中描寫主角分析、踢爆對方篤數過程,所以我話所有分析員要睇之外,仲因套片點講1930年代日本人嘅心態。嗰種沉醉於1905年戰勝俄羅斯後,覺得可稱霸世界嘅妄想。

因套片只可以喺坐國泰(293)時睇到,喺我大力推介後數周,我突然收到朋友王弼嘅短訊問:「你講嘅嗰齣戲,最後起唔起到隻船嗟?」原來佢搭飛機去日本,睇得太遲,睇唔到電影最後幾分鐘,因為飛機到步,空姐「熄咗」個娛樂系統。

我搭咗佢劇情之後,就問佢好唔好睇。佢都話一流,必睇。之後我哋就傾咗陣2020年嘅中國人,心態極似1930年代嘅日本人。嗰種妄想、自大及可帶來對世人嘅危險。

王弼分享話,因我同佢有份嘅智庫(邊間喺本報唔講得,因會激嬲本報港聞版班大姐大佬),有次佢同美帝國務院嘅官傾計。咁講起美帝對日本喺二戰嘅政策,個官就話:「係冇錯,除咗我哋要求無條件投降外。更重要係之後我哋派麥克阿瑟做駐日盟軍總司令。因如果要確保和平,戰勝日本軍人政府係唔夠。一定要徹底進行社會工程,將日本國民嘅心態完全改變先得,將好戰之心連根拔起。」

所以如果花旗國真係上百萬人因武肺死亡,而佢哋喺冇得派人去武漢查個究竟下,真心相信係大陸研究生化武器時洩漏。佢哋一定會視呢場瘟疫為另一次「侵襲珍珠港」。

而佢哋一定覺得只有一個妄想、自大、自信心大過能力嘅民族,先會喺冇系統嘅情況下,玩改冠狀病毒RNA呢啲咁危險嘅遊戲。所以「戰勝」中國執政者,會唔夠。為長遠保護花旗國人安全,一定要十四億人進行全面社會工程。

所以如要我估,習大大求神拜佛梁卓偉教授錯,花旗國人吉人天相。如果唔係,美帝成個機器,將會槍頭指住中共。喺倫敦嘅我,就等睇下一步點囉。

孫柏文