【金手指】立刻沽清股票(孫柏文)

更新時間 (HKT): 2020.02.17 19:38
有線記者1月時向幾位廣州市民提問對武漢肺炎狀況有何想法時,受訪市民當時表示,「不怕,相信政府!」
(互聯網)

世事發展,人人都用03年作比較。不過如果睇股市同資產價格,孫柏文覺得似07年多啲。

如果你炒股年資有番咁上吓,應該記得當年夏天,不但有大陸炒到飛天,中央吹風要「排洪」話會搞「港股直通車」外,仲有聯儲局走出來減息,令市場覺得花旗國「次按問題」為銀行系統帶來嘅衝擊已完。

08年發生咩事,我相信唔使再提。不過如果你當年07年喺最高位一股都冇放,仲要可能借咗錢去炒。你呢刻就停一停、諗一諗08年你嘅感覺如何。

今次係二戰後世界經濟嘅最大衝擊。都唔講人命傷亡,淨係所有供應鏈撕裂下,未來數月全球所有上市公司將會盈警滿天飛。

而我唔知究竟啲央行會點,不過齋攞大陸來講,佢哋終極賺外滙嘅方法係靠出口。現成個經濟停頓,所有企業人民幣債都仲可以叫人行印鈔救命,不過啲美元債呢?大陸啲銀行冇晒啲出口商賺外滙,想借美元俾啲企業還債都冇。

仲要睇外國染病數據,走勢同武漢喺12月相似。到時全球包括例如日本、新加坡等美帝軍事盟友出現大量死亡時,唯一能救大陸美元債嘅聯儲局,係咪真係印鈔借俾人行呢?如借,條件會否寫到永久打爆大陸製造業?到時會否向香港嘅銀行攞,終極打爆香港呢隻錢罌cash out保黨政?

07年,我眼見次按風暴已到,不過股市升五成嘅情況下叫沽清捱鬧。今日港股雖無當年嘅升幅,不過建議一樣:將手上股票立刻沽清。

唔沽,咁你同一月中喺大陸街頭被《有線電視》記者問點解唔戴口罩時啲人答:「不怕!有政府不怕。不戴,相信政府!」有咩分別?

孫柏文

關心你飯碗,貼近你生活,即Like「蘋果ATM」FB專頁!
BannerBanner