【大棋局】被動式大蕭條來襲(Mr. Tregunter)

更新時間 (HKT): 2020.03.02 18:00
Mr. Tregunter:惡性通脹埋下社會動盪因子;各國政府可以將武裝部隊劃為次等特殊階級維護治權。這是步入亂世之前夕。
(互聯網)

疫情的高峰是股市第一階段的低點。樂觀的預期疫情在2月尾達到高峰,加上市場亦開始預期各大央行將會減息救市,因此股市反彈有機會在近期出現。但戲肉在第二階段。

資產炒爆就重新嚟過,過去經濟周期如此。唔畀佢爆,以印銀紙托住資產價格,其實只係以將來的生產力折現入今日債務條數;如果以負利率侷人提前消費刺激經濟,亦只係消耗平民儲蓄率去填數。所以QE係吃子,負利率係坑爹。

QE比負利率有效,原因在科技進步,聽日嘅生產力會高過今日。故此以將來的生產力折現入今日債務條數有得諗。印銀紙會通脹,通脹會溝淡債務,而將來生產力提高可以逐漸填補資產炒爆條數。自布雷頓森林體系瓦解後,各國貨幣進入無錨貨幣體系。通脹,就係呢套體系的重中之中,全球央行最驚冇通脹。

武漢肺炎大鑊之處,係由中國開始,世界多處被迫停工。由於QE係提早折現,當經濟停頓,折乜嘢現?就算現下係疫情最高峰,之後會緩減,何時完全退散仍屬未知數,大量市民仍然唔敢開工,盡量減少生活支出,係一次被動式的經濟蕭條。

1929年大蕭條前,美國經濟數據亮麗,分期付款亦於20年代發明。分期付款就係提前折現最簡單的例子,件貨太貴,今日要賣呢口價,就要你用未來的收入提前折現。貨商賣到靚價,條數靚仔,但咁樣增長係咪可年年維持?1929年華爾街股災話畀當時的人知唔可以。前聯儲局主席伯南克主力研究大蕭條,其得出的結論係,炒爆咗,只要政府量化寬鬆為市場提供流動性就可以頂住。

大蕭條的教訓讓各國明白唔可以閉關,唔可以停止貿易往來,否則會全球慘。武漢肺炎卻讓各國被動地閉關,被動地停止貿易往來。癥結在一旦疫情維持一段長時間,央行減完息後可以做的只有QE。和2008年不同,在開工率不足,生產力趨下的情況QE,只會引來惡性通脹。央行係歡迎通脹蠶食債務,但害怕惡性通脹。惡性通脹會引發社會動盪,比如80年代末中國通脹率超過20%,係引發六四事件的一個重要因素。

我們明白大蕭條的教訓,可以藉由央行量化寬鬆化解流動性危機;停工下之量化寬鬆,容易引發惡性通脹;惡性通脹埋下社會動盪因子;各國政府可以將武裝部隊劃為次等特殊階級維護治權。這是步入亂世之前夕。

關心你飯碗,貼近你生活,即Like「蘋果ATM」FB專頁!
BannerBanner