【專訪】港產酒店平台網站 「Package價」訂房賺另類待遇 

更新時間 (HKT): 2020.03.03 00:00

大型網上酒店預訂平台早已全面攻佔本港市場,但若能洞察未被發掘的行業需求,總有創業空間。從事旅遊推廣及酒店預訂工作近十年的港人楊嘉耀(Jason),去年底脫離打工行列,自行搭建酒店限時優惠預訂網頁Luxxzy,標榜「訂酒店送體驗」的套餐式銷售,趁對手攻港前,盡快搶佔本港市佔率。

「其中一個我哋想solve(解決)嘅問題係,你去到一個國際品牌網站,有幾十萬間酒店,一個地方都有幾百間,逐間去比較係好難嘅事;你係咪需要比較幾十萬間呢?掉返轉頭我哋已經幫你揀咗」。曾於酒店預訂網站Hotels.com擔任亞太區公關經理、現為Luxxzy創辦人及總監的Jason認為,現時酒店預訂平台數目雖然多,但商業模式千篇一律,漁翁撒網式提供不同地區的所有酒店,無篩選之餘,每間酒店的服務介紹和活動推介欠奉,未能確切解決用戶「邊間酒店好?」的問題。

Package價訂房任做spa

如是者,Luxxzy 選擇走「貴精不貴多」的路線,每次為期三星期的限時優惠,只提供15至20間不同價位的四星級或以上酒店預訂,「package價」包括至少兩項酒店服務或體驗,「入門級」有迎賓飲品、免費high tea等,「進階級」有沙灘泰拳課程,甚至全日任做spa,入住天數越多,套餐優惠越多。

不過「羊毛出自羊身上」,房價未必做到全城最抵,而且入住天數一般為兩晚或以上才享有附加服務,「盡量做到同出面價錢差唔多,而我哋多啲offer;有陣時可能會貴少少,但我哋就多好多offer,嗰啲offer可能係好值錢,你自己都會畀錢買,我哋先會擺落去。」

受肺炎疫情影響,不少大計無奈叫停,Jason坦言,預訂交易量和用戶詢問度已跌至相當低的水平,「大家都好擔心book咗去唔到」,現階段又的確不宜外遊。公司趁外遊低迷期改進內部系統,包括改良平台設計界面、研發手機應用程式等,與酒店夥伴集中商討4至5月的合作。「疫情過後,屈咗咁耐,大家都會好想出走去多啲旅行?」他對公司前景仍然感樂觀,軟件齊備後可全力迎接反彈的外遊需求。

曾遭酒店冷酷拒絕

酒店限時優惠預訂的商業模式首次由Luxxzy引入香港,公司暫無直接競爭對手,單憑Luxxzy開拓香港市場並不容易。「擔心㗎講真,嘗試將呢個模式話畀大家聽係點樣囉,總有辦法生存到。」Jason不諱言,曾經被大品牌集團冷酷地拒絕,令他反思:「我哋係咪帶到佢想要嘅客人畀佢呢?」始於起步初期,會員人數及知名度不足。Luxxzy去年12月底成立至今不足3個月,網頁設有中英文版本,有助日後開拓大中華區、新加坡、馬來西亞的市場,目前會員數目逾300人,目標今年第三季會員數目可增至1萬個。

他笑言,待累積更多會員後會再接再厲;亦有酒店看中團隊具備豐富市場推廣經驗,願意合作,「如果海外酒店一直都冇特別喺香港做marketing,佢哋又有興趣進軍呢個market,有人幫你promote,佢哋就唔需要特登喺香港再build up一條marketing team。」

這類網站在外國發展則相對成熟,澳洲代表有Luxury Escape,英國代表有Secret Escape,平台規模及品牌定位均發展不俗,後者近兩年更先後收購多個對手,包括從去年陷入財困的英國旅遊科技公司Malvern Group手中,收購酒店預訂網站LaterRooms、愛爾蘭限時網購優惠平台Pigsback等,2018年年度收入達1.01億英鎊(約10.2億港元)。Jason認為,此概念針對識玩識嘆識享受的旅客,在香港有發展潛力。礙於外國對手一直未有繁體中文版網頁,對打入亞太市場有一定難度。「喺亞洲都需要一個,我哋喺香港出發先;希望佢哋未嚟之前,我哋已經做咗個市場定位喺度,有一定嘅market size喺度。」Luxxzy前期投資額數十萬元,暫未有需要對外融資,未來會多投放資金於市場推廣,望他日成為香港代表。

關心你飯碗,貼近你生活,即Like「蘋果ATM」FB專頁!
BannerBanner