【蘋果驗樓】屯門新劏房密集式「焊屎」 廁所兩個衰設計

更新時間 (HKT): 2020.03.06 00:00

《蘋果驗樓》邀請資深驗樓師詹濟南驗收資本策略(497)旗下尚家生活發展的屯門單幢樓城‧點一個217方呎劏房,全屋最大塊玻璃驚現密集式「焊屎」,即是燒焊火舌黐住玻璃。業主黃先生初時以為是污迹,卻沒料到後果不堪設想。

詹Sir強烈建議撤換「焊屎」玻璃,事關他曾經驗收某屋苑多個單位玻璃有「焊屎」,結果暑假曬爆幾十塊。單位瑕疵主要玻璃差,驗樓評分雖有81分,但廁所兩個設計衰,馬桶水箱蓋被螺絲封死,洗手盆弧形邊容易滲水入櫃底令木板發霉,詹Sir批評:「不切實際!」

詹Sir驗收城‧點低層戶,實用面積217方呎,業主黃先生2017年以約300萬元買入。單位大門邊設入牆櫃收藏洗衣機,但今時今日買新樓卻附送上置式洗衣機,較為少見。開放式廚房鋅盆及去水喉沒有漏水,但地台水蓋高過地面,詹Sir指:「堅離地,會藏水。(這種喉管設計需否倒水防止病毒入侵室內?)呢個唔怕,呢條去水喉直接排水,唔使專登倒水落去。」與詹Sir同行的康仔在單位唯一大窗畫出數之不盡的圈圈,詹Sir過目後說:「呢啲焊屎,塊玻璃一定要換。」

業主黃先生不諱言:「初時以為污糟嘢,可能出面裝修時整到,咁打風會唔會爛呢?」詹Sir答:「我只可以話,好多年前,驗過一個屋苑約10%單位,當時發現好多玻璃入面有焊屎,結果一個暑假爆咗幾十塊玻璃。呢啲焊屎有時被太陽曬得勁,因為係金屬,一曬發脹,結果逼爆玻璃。(目前睇非常密集呀?)唔係好密啫,都唔夠中大咁密,記唔記得呀,幾千發(催淚彈)呀!」

大窗對上有條像引體上升的把手,詹Sir說是幫助開關窗戶,他一邊開窗示範,一邊說:「開窗後,根本拉唔返個窗柄,於是貼心地加裝手柄。但個窗有撞鎖,又鎖鬆。」閂窗後放紙條檢查,可見窗邊漏風,漏得風時漏得水,「打風時,業主就唔得閒喺度抹水㗎啦。問題係個窗封得唔夠實,唔理想,都唔可以接受,呢啲要全面封實。」

封不實的地方還有浴室企缸浴屏門,沖涼勢必灑到一地水。洗手盆沒有來去水問題,但詹Sir提醒業主:「用水小心啲,唔好以為無事,因為盆背有條大罅,而櫃內木板有個開口,啲水會滴落嚟。櫃入面係普通木板,啲水滴後,好易漚爛。漱口洗臉越呢啡,你個櫃就越容易玩完。(業主問:封條膠會唔會無事?)無得封,封唔到嚟角落頭,盆角係弧形設計,惟有自己小心啲用。」他批評:「呢個設計直頭係無諗過用家!」

他又指出,馬桶水箱蓋設計都好衰,「通常一揭就開,或者扭開按手掣打開,但呢個……唉!好煩,拉開兩個按水掣,再伸入螺絲批扭開粒螺絲,即是平時啲水太黃太濁,都要咁樣甩佢出來,呢啲設計真係不切實際……水箱使乜鎖到咁實,唔通真係有人收埋鑽石戒指喺入面咩,一揭開方方便便咪算囉……應封就唔執,呢啲唔應封就封實晒。」業主無奈稱:「打開之時,應該就係換走佢嘅時候。」由於驗樓評分計算15項工種,設計不屬於瑕疵,單位主要是窗戶玻璃不及格,扣分最多,另有部份瓷磚及油漆瑕疵扣分,單位有81分。

業主黃先生表示:「當時市場上真係無乜選擇,2017年樓市比較貴,新界樓起標都萬幾蚊一呎,喺當年呢度算係抵。但而家比較有啲影響,暫時自住,唔會擔心升跌。我覺得買樓無必要撻定,買得就對呢個地區有信心,佢有發展,樓市跌極都總有一天會升。」不過隨住樓價下跌,不排除將這個劏房放租,然後於其他地區承租面積較大單位來住,他堅持不沽出這個單位,「呢度唔會甩手住,因為仲有升值潛力,始終交通方便,近屯門市中心,唔會跌到話咩,有升值潛力。」

尚家生活發言人回應,已收到業主的執漏清單,承建商會積極跟進,預期可於3月8日或之前完成有關執修及檢查工作。

關心你飯碗,貼近你生活,即Like「蘋果ATM」FB專頁!
BannerBanner