【全球冧市】街頭捕獲沈大師:我而家返去撈貨 呢下毋須太過驚

更新時間 (HKT): 2020.03.13 13:41

《蘋果》記者今早於中環巧遇訊匯證券行政總裁沈振盈,「沈大師」接受訪問時表示,對港股長遠表現仍然樂觀,「唔需要太過驚嘅呢下」,又指「過往嘅經驗都經歷唔少,殺到呢啲咁恐慌嘅,點都會有好勁嘅反彈」。散戶如重倉的可以博些許反彈再減磅;若有持貨能力,現金仍然充裕則可以於今日及星期一分注買貨。

他直言「呢啲環境咪係畀啲有實力嘅人買貨,冇實力嘅人咪要打囉」,因為現時市場恐慌性拋售,加上早前日圓急上,不少基金需要利差交易「拆倉」,好多股票已經「跌過籠」。他建議想入貨散戶可以留意5G概念、電訊設備及新經濟股,「今日隻騰訊(700)跌到330幾、340呢啲位抵買㗎」。沈大師臨走前拋低一句「我而家返去撈貨啊!」

港股午後急彈

美股道指昨日急跌2,352點,港股今早亦低開1,789點,於中午收市仍跌逾1,400點,惟午後資金掃高環球股市,港股跌幅收窄至328點。

散戶鄭先生:打算趁低吸滙控、阿里

散戶鄭先生亦打算趁低吸納,心水股有滙豐(05)及阿里巴巴(9988)。他認為今日之後大市有機會再下插,故會分注買貨較為保險。目前有大概四成資產為股票,包括阿里巴巴及港燈(2638)等,已持有多年。他相信「個市唔會跌到冇影」,預計跌多一千點見底,會趁今次跌市投入更多資產至股市。

市場對美國總統特朗普會出手救市心存希望,他卻表示,「佢(特朗普)都冇諗過救啦,睇佢個樣」,更指特朗普也可以趁機賺一筆,「好唔好都係靠佢,講一聲就勘勘聲(上升),佢唔執到笑咩」。他認為港股要依靠A股支撐,才有望回升。

記者 江子

關心你飯碗,貼近你生活,即Like「蘋果ATM」FB專頁!
BannerBanner