【大棋局】大蕭條如何煉成(Mr. Tregunter)

更新時間 (HKT): 2020.03.23 19:16

蕭條不等於通縮。蕭條係經濟現象,通縮係貨幣現象。通縮會加劇蕭條,係另一回事。經濟衰退,冇生意,買賣兩閒,係蕭條;貨幣增長率低於經濟增長率,銀紙購買力變強,係通縮。通縮之際,由於聽日件貨會平過今日,後日會平過聽日,人們將購買計劃押後,生意更加難做。經歷過30年代大蕭條,經濟學家得出一個結論,就係經濟蕭條時要嚴防通縮,否則螺旋式向下攪,搞唔掂。

正路有過去的教訓冇咁易重蹈覆轍。30年代大蕭條遠因,為經過第一次世界大戰歐洲殘破,需要大量物資重建,美國源源不絕供應,20年代美國經濟一片繁榮,當代無出其右。但1929年股災將這個美麗泡沫刺破,當時冇人知泡沫幾時見頂,爆咗先知原來嚟料。

由於20年代多數國家仍然行緊金兌本位制,即黃金作為儲備,日常用銀紙,政府承諾本國貨幣同黃金掛鈎。佛利民就指30年代大蕭條咁大鑊,喺金兌本位制下,聯儲局又受《聯邦儲備條例》所限,無法隨便印銀紙。當股市爆煲,人人勒緊褲頭減少消費,經濟衰多兩錢重。政府增加財政支出亦有各種限制,遠追不上通縮速度,終於一鑊熟。

當時仲有另一問題,就係貿易保護主義抬頭。各國陸續為自保,關稅壁壘、禁運、貿然限額等手段盡出,以為可以保護本國產業,點知又係越搞越大鑊。上述兩大要點可謂近代共識,於是經濟出大問題時,第一唔可以搞貿易保護,第二要印銀紙避免流動性出問題。

但今次令全世界央行頭痕嘅係,形勢發展令兩大共識明知都冇用。特朗普去年發動貿易戰,並非要真搞貿易保護,係虛的,目的在打開中國市場,貿易戰只是一個手段。現時情勢,全球各地封關封城,貿易本已減少,工廠停工亦冇嘢賣。中美貿易協議見端倪,或會出現一種情況,到時中國話畀錢買,美國冇貨出,協議是否會中斷?

最複雜的,在通縮通脹開邊瓣。全世界停工而央行QE,係應該惡性通脹;沙地同俄羅斯反枱,油價腰斬,順手隊爆高負債的美國頁岩油生產商,係通縮來襲。近期幾乎所有嘢都跌,但分水嶺應該就快出現。受停工及疫情誤時的必需品,如糧食,估計會見底大升;高度受資金流動性左右的資產,如股票,央行一針嗎啡唔掂會第二針,熊二大反彈後會再插。到時先係最艱難情況。

Mr.Tregunter

關心你飯碗,貼近你生活,即Like「蘋果ATM」FB專頁!
BannerBanner