【異動空間】油價再彈點樣博?(魏力)

更新時間 (HKT): 2020.04.02 21:00
魏力:賭油價再彈的話,用石油ETF去博會著數啲。

油價傳來好消息,「三桶油」帶起港股低位挾足500點,回補3月25日的上升裂口之餘,亦能以大陽燭dayhigh收市,短線似可再挾一轉。值得留意,周四波幅唔細之下,大市成交只有897億銀,創個半月新低。傳統智慧話齋,細成交升代表動力唔夠,但換個角度睇,不用太多錢就能推上去,亦代表沽壓減輕,有力向上再挾。目前牛熊街貨係三七比,貼價熊亦有不少,如油市談判有進展,借勢推高至23,800附近亦不困難。

近排通街都博油股,但要留意,3月9日石油價格戰開打,油價單日狂瀉3成至30美金,當日中海油(883)收報8.79元,中石油(857)報2.72元。去到今日,油價不過彈番去22美金,中海油已幾乎收復所有失地,中石油更是升凸1成,明顯兩者已行快油價好多,再上仲有幾多水位?賭油價再彈的話,用石油ETF去博會着數啲。

油服股方面,美股已見減價戰「第一滴血」,頁岩油公司Whiting在愚人節入紙申請破產,反映行業已出現資金鏈斷裂問題,爆煲應陸續有來,而香港上市的油服股(除中海油服(2883)外),小弟就不會以身犯險了。

其他板塊方面,疫情陰霾未除,各國封城停工持續,大陸有開廠都未必有單,有單都未必夠物料去做,所以製造業、出口股暫不考慮。信心較大的目前只有醫療、5G及網購股,中興通訊(763)蓄勢再上,值得留意。

筆者為證監會持牌人,持有中興通訊財務權益。

關心你飯碗,貼近你生活,即Like「蘋果ATM」FB專頁!
BannerBanner