【智取大市】當妖股勁過科技股- 晉佳

更新時間 (HKT): 2020.08.07 02:00
港股近日細價股、妖股周圍飛,呢啲市況,炒得一日得一日。 資料圖片

美股道指近日開始跑贏納指,最近一兩星期,美股升幅榜開始由舊經濟股佔據,而龍尾股AAL都開始趁航空業救助計劃嘅利好消息追落後,爭在郵輪股CCL之流未起動。資金轉捧舊經濟殘股,對於科技股大牛市嚟講,唔係一項理想嘅表現。至於港股方面,熱炒半新股已經算主流嘢,更甚係近日細價股、妖股周圍飛,連微信女騙局嘅中伏股出現頻率都提高埋,呢啲市況,炒得一日得一日。

呢一刻,即市機會似乎多的是,仍可按股價沿5天線向上爆發作為入市條件,尋找短線目標,股價大幅拋離5天線就食糊,跌穿5天線就止賺。

整個8月計,維持之前預測,美股以至港股喺今個月內可能出現大型調整甚至大跌市,下跌幅度相信係3月下旬美股升市以嚟最大,任何單日大成交下跌會成為跌市嘅開端。𠵱家興炒舊經濟股、細價股,主流美國科技股上升空間同速度相對有限,不妨分段減磅獲利,務求將風險系數減低。

正經一啲嘅股份選擇當中,5G概念股鐵塔(788)都喺低位出現首支大陽燭,但同樣呆滯多時嘅京信通信(2342)相信更值博,最近幾日轉強,成交醞釀增加,可博挑戰4蚊。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner