【智取大市】舊經濟復蘇股抬頭-晉佳

更新時間 (HKT): 2020.08.10 02:00
■中遠海控為貨櫃航運業龍頭,定位最食得應疫後復蘇,近期股價表現亦係行業之中最佳。 互聯網圖片

港股周五因為美國制裁微信而一度急跌。美股方面,非FANGMAN嘅軟件股出現小股災,可以話有三分之一個美股熱炒陣營大震盪。資金同時流入舊經濟板塊。美股裏面,銀行股、航空股都沿5天線慢慢升,嚟緊一周資金流入呢批舊經濟落後股,有機會升幅擴大,而科技股預計會持續振盪。

嚟緊一星期,相信港股總有風險胃納回升嘅時段,有復蘇潛力嘅低殘舊經濟股,以及細價股,有機會炒上,揀股要從基本因素出發。

航空股賺錢嗰部份係客運而非貨運,若然憧憬疫後復蘇,航空股嘅復蘇進度必然較遜色,貨櫃航運股會較秤先。中遠海控(1919)本身有貨櫃運輸、碼頭業務,近年收購東方海外75%權益,已形成霸主佈局,負債高形成槓桿偏高,行業反彈時非壞事。以中遠海控龍頭地位,定位應該最食得應疫後復蘇,近期股價表現亦係行業之中最佳,但長遠當然要留意佢係貿易戰受累股。

舊年運2,574萬隻貨櫃,佔全球15%,每年吞吐量達1.24億箱,以H股股價計,市值得400億,作為運輸行業必要環節嘅霸主,市值不足阿里(9988)嘅1%,長遠遲早會修正。短線中遠海控呈升勢,5天線現支持,呢個星期炒舊經濟股應有佢份。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner