【笑到最後】如果我突然一無所有-高明

更新時間 (HKT): 2020.08.10 02:00
■過去十幾年,好多香港股民都喺港股度浮浮沉沉,第一個原因係港股土壤問題,第二個原因係揀股方法出錯。 資料圖片

「如果我突然間一無所有,冇得用iOS、Andriod、Gmail,我可以點算呢?」過去十幾年,包括高明在內,好多香港股民都喺港股度浮浮沉沉,唔少人都宣稱佢哋「贏大鑊」,觀察所得,即使真係「贏大鑊」,只要你留喺港股市場,都會喺第二度輸返,情況同去澳門賭錢接近。第一個原因當然係港股土壤問題,第二個原因,就係揀股嘅方法出錯。

港股係一輪輪潮流,金融機構同傳媒合唱,由四萬億方案資源股、到之後二三線股、殼股、賭股、AH股、2015年港股通、2017年騰訊(700)+平保(2318)同一堆新經濟新股、到今年W股同B股。搞一大輪其實冇幾多隻股持續升咗咁多年。同樣準則,去美國命中率高好多,至少由你日常生活用到嘅美國公司去買,過去十年回報肯定好過留港四圍撲。

歸根究柢,因為香港太容易接觸全球產品,任用時就好似空氣,根本唔會珍惜。簡單如一個Gmail,當年打破咗電郵只得10M空間嘅概念,到依家靠呢個電郵賬戶,接通咗幾多其他產品嘅戶口。日日用根本冇感覺,所以冇太大動力,將呢種對產品嘅依賴性轉化為買佢嘅股票嘅行動。

反而留喺港股市場左撲右撲,而冇諗嗰啲股嘅產品有乜咁偉大。如果有一日你冇得用啲咩資源股、AH股、殼股、新經濟新股、B股嘅產品,對你生活影響可能冇乜。冇得用騰訊嘅Wechat,可能真係影響好大,亦都解釋返佢股價嘅強大。

中美角力,喺美國已經冇得用抖音、Wechat,倒返轉香港將來冇得用Gmail、Whatsapp,已經係有可能發生嘅事。由禁用名單思考,邊種產品你冇得用會好煩,制作出一個選股名單,買嗰啲股,未來十年表現一定好過你跟潮流追乜W股、B股。

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner