【操盤手札記】$3.88上市的天與地-割柑人

更新時間 (HKT): 2020.08.11 02:00
■國泰無生意,與其將啲飛機泊喺沙漠等報廢,不如轉做「機艙醫院」幫下港人。 資料圖片

上周三,特朗普接受《霍士新聞》訪問時話,美國撤銷香港特殊待遇後,香港唔再係成功嘅金融交易中心。翌日,港交所(388)股價無被拋窒,開市無耐更衝上388元,創歷史新高,係2000年6月27日以介紹形式上市時股價3.88元嘅100倍!

另一以3.88元上市嘅股票,命運就差天共地。此股業務喺天,但股價折翼墮地,講緊國泰航空(293)!1946年,國泰喺香港成立;1986年,40周年,以3.88元招股上市,超額認購55倍創紀錄,5月15日掛牌,6月晉身藍籌;2017年,被剔出藍籌。

國泰唔係未風光過,2003、2005、2009同2014年,都獲選Skytrax「全球最佳航空公司」,係唯一四度奪冠嘅航空公司。2010年,盈利高達140.5億元,12月6日股價高見24.1元,市值高達948億元。相對現價5.09元,市值327億元,情何以堪。

國泰究竟衰邊瓣?上市至今,曾經喺1998、2008、2016同2017年蝕錢,主要係金融危機、燃油對沖累事;周三將會派發今年中期成績表,上月已發盈警,預計蝕99億元。大疫當前,早前更要政府入股打救,兼要供股救亡。

港交所同國泰,港府都係股東,持有前者6.12%,後者6.08%。論前景,港交所受惠中概股由美國回流,加上螞蟻集團呢啲巨企嚟IPO,生意無憂;至於國泰,則無生意,三分一客機將轉移外地停泊,例如澳洲沙漠。

話時話,與其將啲飛機泊喺沙漠等報廢,不如轉做「機艙醫院」幫下港人,同亞博拍住上,例如男士住方艙,女士住機艙。改裝飛機做臨時醫院租畀政府,一家便宜兩家着,有冇得諗?周一,喺中美鬥法下,港股跌0.6%;港交所跌1.9%,國泰則跌7.1%。

割柑人

關心你飯碗,貼近你生活,即Like「蘋果ATM」FB專頁!
BannerBanner