【智取大市】小心長期輪動跌市 - 晉佳

更新時間 (HKT): 2020.08.12 02:00
■美國科技股大跌市警號出現咗,納指喺高位5天開始支持唔住,資金同時湧入龍尾舊經濟股。 資料圖片

望住壹傳媒(282)呢種奇蹟升浪,只能說自己太無智慧去解釋,枉呢個專欄叫做「智取大市」。冇咩事,我都係返埋位review返個市。

之前講8月科技股大跌市警號出現咗,截至目前,納指喺高位5天開始支持唔住,唔計蘋果,AMZN同MSFT喺高位都遇阻,美國次線科網股更加已經由高位急回兩至三成,資金同時亦湧入龍尾舊經濟股,情況正向住上月尾嘅劇本進行中。

港股情況相若,恒指升逾500點,藍燈籠中移動(941)升3.6%,連最龍尾嘅國泰(293)都反彈3.1%,新經濟股以至一眾升浪強勢股都回吐,相信會形成同美股類似嘅格局,短期內新經濟股跌、舊經濟股升,而舊經濟股升勢亦偏向短暫,整體市況進入輪動跌市,而非2、3月嗰種單邊大跌市。換言之,同一時間只有少數當炒股升、多數熱門股下跌。

點解係輪動跌市而唔係2、3月嘅單邊跌市?原因係聯儲局表明確保未來唔會出現市場風險,可以預期資金會一直偏向充裕,單邊跌市人踩人嘅可能性唔高,會形成比較長期嘅派貨階段,與此同時,少數當炒股上升會引短線客留喺市場,揸住科技股就會望住股價向下,而單日大跌市過後可能會有短暫見底反彈,途中會震走喜歡高追、跌破支持位止蝕嘅趨勢型散戶,即使睇淡追put,亦可能被反彈挾親。聽到都覺得難玩,大家要小心。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner