【魚樂無窮】輪動市況怎應對 - 唐牛

更新時間 (HKT): 2020.08.13 02:00
■市場開始炒作放寬限聚令及食肆晚間禁堂食,大快活有4厘息墊底,不妨留意。 資料圖片

股炎疫情加上全球放水,今年科網、醫療、物管及教育股大部份時間要風得風,破頂再破頂,不過,一遇上疫情降溫,沽盤便隨即淹至。好似噚日咁,疫苗疑似有突破進展,憧憬肺炎有藥醫下,上述板塊被沽到一仆一碌,資金全部轉場至殘爆的舊經濟股,銀行、地產、零售、航空股一擁而上,近期最弱雞的滙控(005)都有近半成升幅。所以指數升幾百點,但唐牛倉位埋單要輸錢收場。

事實上,以上情況唔係第一次出現,亦唔會係最後一次,遇上輪動情況要點做?高手可以從資金流走勢,率先減倉甚至換馬,自問轉身能力冇咁高,唯有採取賺頭蝕尾嘅策略,每次將倉位止賺位調高,一旦觸及便減倉提高現金水平,待市況重拾正軌時才重新落場,昨日已沽出部份持倉,有止賺有止蝕,總之要嚴守紀律。

可以預期,短時間內都係舊經股佔上風,有興趣短炒的戰友,不妨留意大快活(052)及維達(3331)。本港疫情稍為放緩,市場已開始炒作放寬限聚令及食肆晚間禁堂食,大快活有4厘息墊底,若能突破18蚊,下站可衝上19.5至20元區域;維達則屬強勁增長一族,中期盈利狂升逾倍,昨日稍跌穿50天線即見買盤,短炒以此作計數位,博上番30蚊樓上。

唐牛

http://fb.com/tongcow88

關心你飯碗,貼近你生活,即Like「蘋果ATM」FB專頁!
BannerBanner