【智取大市】重啟貿戰跌市模式 - 晉佳

更新時間 (HKT): 2020.08.14 02:00
■外媒話嚟緊星期六,美國貿易代表萊特希澤(左)同中國國務院副總理劉鶴(中)將會進行視像會議。 資料圖片

上一期提到股市可能即將進入輪動跌市模式,但美國狂印銀紙確保冇系統性風險,難以令美股形成類似3月嗰種整個月單邊大跌市走勢。

外媒話嚟緊星期六,美國貿易代表萊特希澤同中國國務院副總理劉鶴將會進行視像會議,喺美股位處高位嘅情況下,大有條件發難,特朗普喺大選前,亦估計會放手一博。

恒指方面,嚟緊有可能重返中美貿易戰時期走勢。回顧返2018年3月至12月同2019年4月至8月兩個階段嘅中美角力時期,恒指一有壞消息,指數就會出現數日急跌,然後呈上落市,再有下一轉壞消息又會再跌過,途中欠缺具意義嘅大市反彈。未知星期六會唔會成為中美新一輪爆發點,相信指數稍後走勢都會相若。

配合之前所講,武肺疫苗嘅出現,會提早令股市資金流向樓市同實體經濟,美國亦會限制M2升幅。即使疫苗嘅出現未必即時帶嚟極大幫助,但各國領導人肯定會借機進一步重啟經濟,於是無論如何都會對股市資金流構成衝擊,至於中美負面消息就更加係向股市「加辣」。休股期將臨,與此同時繼續物色真正長線復蘇概念股,等待下一次機會。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner