【智取大市】惜食造就高通脹概念 - 晉佳

更新時間 (HKT): 2020.08.17 02:00
■內地全民「惜食」運動推升到國家立法層面,似乎同通脹有一定關係。留意通脹受惠股,稍後有機會跑贏大市。 資料圖片

全民「惜食」運動推升到國家立法層面,對於中國嚟講,的確相當新穎。有人解釋係因為長遠糧食供應問題,亦有人話係中國耕地大幅減少,長遠更難自給自足,其實亦有另一個可能性,就係通脹。

回顧09年美國QE1時,中國喺當年8月話要進行一輪宏觀調控,令到A股大幅調整。美國印多咗銀紙兼零息,有可能推高環球通脹,以過往經驗,中國往往係較容易吸收輸入通脹嘅經濟體系。

美國印銀紙,令M2出現戰後最強勁嘅貨幣供應增幅,喺股市方面已見威力。既然股市已急升,未來面對通脹威脅嘅機會相信比通縮為高。面對疫情陰霾已成過去、兼有洪災影響農牧產品供應嘅中國,通脹壓力睇嚟比美國相對高得多,「惜食」運動似乎同通脹有一定關係。換言之,大家要考慮上述因素影響中國貨幣政策走向之餘,估計「惜食」運動難以阻止食品價上漲。中糧肉食(1610)、日清食品(1475)呢類通脹受惠股,稍後有機會跑贏大市。

喺資金非常氾濫嘅年代,由不受歡迎變成受歡迎板塊,資金蜂擁程度會將股價反應誇大,例如一眾美國雲端股份咁,明知收入受惠疫情可能只持續幾個季度,都可以令股價上升2倍甚至更多,估計未來一至兩年,資金流向相對估值重要得多,當時得令嘅板塊通常會升到計唔到數,值得留意。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner