【操盤手札記】買收息股 像極了愛情 - 割柑人

更新時間 (HKT): 2020.08.18 02:00
■香港電訊已推出5G服務,可望加快上客,提升ARPU。睇股價圖,剛出現10天線突破20天線利好訊號。 互聯網圖片

上周六,正值中美第一階段貿易協議生效半年,雙方原定當日舉行視像會議,評估執行情況;不過,會議臨時押後,據《路透》講,中共高層仍喺北戴河開會,而且中國需時買美國貨。

近日中國大買美國大豆同原油,似為力保評估過關。中國買嘅,唔係豆同油咁簡單,而係中美關係最後防線!美國接連喺新疆、香港、台灣等問題發難,施加制裁;又喺台海、南海、東海等區域,加強軍事部署。上周六,美軍偵察機更逼近廣東福建50海浬,台海儼然成為亞洲最危險火藥庫。

中美瀕臨脫鈎,加上肺疫影響,中國改變經濟運作模式,以國內大循環為主體。按其構思,整條供應鏈同需求鏈嘅大循環都喺國內,以應對貿易、科技、金融等戰線。經過中美之爭同疫情,世界勢由globalization重返localization。

市場觀望中美貿協評估嘅新會期,以及TikTok、WeChat嘅禁令係咪擺上枱傾。周一,受人行加碼放水沖喜,A股漲2.3%,帶動港股漲0.7%。恒指收25347,短線阻力喺250天線25800關口,支持喺10、20、50天線滙聚嘅25000關口。現時嚟睇,唔太受疫情同中美之爭打擊嘅行業仍為持倉首選。

對穩健投資者嚟講,偏向揀收息股;不過,自從發生滙控(005)「失息」事件,必須帶眼識股。買收息股,通常唔係睇短線,而係睇長線,像極了愛情!收息股中,香港電訊(6823)早前派中期成績表,中期息30.1仙,同上年差不多,按往績同現價計,年息率達6厘;要注意嘅係,下周二除淨。集團已推出5G服務,可望加快上客,提升ARPU。睇股價圖,剛出現10天線突破20天線利好訊號。

割柑人

關心你飯碗,貼近你生活,即Like「蘋果ATM」FB專頁!
BannerBanner