【智取大市】人行放水 開拖訊號? - 晉佳

更新時間 (HKT): 2020.08.19 02:00
■人行周一突然推7,000億MLF,放水程度出乎市場意料之外。 資料圖片

資金蜂擁ATMX同中資電訊股,其中面對美國百毒不侵嘅美團(3690)升7.7%,中國科技股風眼之一嘅騰訊(700)升最少,政治風險胃納成為資金流向一大要素。

周一人行突然推7,000億MLF,一次過續埋直至8月26日到期嘅MLF,仲有淨投放1,500億,放水程度出乎市場意料之外。明明《路透》喺7月下旬報道,人行將會暫停寬鬆貨幣政策,唔通今次貨幣政策急轉彎?明明疫情打擊漸過,莫非洪災將會重創經濟?又實在唔似。有留意《路透》當時報道嘅話,就講到人行免生市場泡沫嘅同時,係為咗中美緊張關係預留彈藥。而呢7,000億MLF,話係為咗中美角力升級而做準備,而唔係貨幣政策再度寬鬆嘅趨勢重現,相信會更加合理。

睇返股市反應,人行放水推動恒指升勢只係維持大半日,A股以至國壽(2628)等內險股冇連環升勢跟尾,曲線否定貨幣政策新趨勢重現嘅睇法,市場有可能預示呢7,000億MLF係為抵抗美國下一輪攻勢以至中國下一步反制行動。呢7,000億等於開波前set定嘅戰壕,特朗普要爭連任,中國要特朗普下馬,大選臨近雙方都有出招誘因。睇返A股主要指數走勢,像極了舊年4月時美國發動新一輪貿易戰前嘅走勢。即使科技股單日升到嘭嘭聲,但超買同時風險上升,持倉水平實在有調整嘅需要。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner