【智取大市】美團業績不再無敵 - 晉佳

更新時間 (HKT): 2020.08.24 02:00
■美團第二季業績,收入純利大數都勝預期,今次業績水份甚高,以現估值計,持貨者獲利確實不為過。資料圖片

睇返上周五美團(3690)公佈第二季業績,收入純利大數都勝預期,股價升到245蚊基本上超前反映若干年利好因素,要注意今次業績水份甚高,論單季數字唔算無敵,未知周一投資者信條大數股價再爆上,定係睇清盤數水份而股價見光死。無論如何,以現估值計,持貨者獲利確實不為過。

論盈利表現,今次美團嘅水份,係靠其他收入撐住,假如扣除金融資產減值、金融投資公允價值變動,再扣埋以獲取稅收優惠同理財投資收益等等嘅其他收益,經營溢利按年只增長21%。當然酒店旅遊業務喺疫情下有待復蘇,其實表現算係咁,但夠唔夠撐股價呢?

收入勝預期,勁過八成大行預測,但外賣業務收入增長13.2%,不足之處係遜於死敵餓了麼嘅15%增幅,中國外賣市場滲透率開始高,未來增幅自然減慢。收入谷大咗,固定成本比例下降,經營槓桿亦會下降,靠收入上升而令盈利倍數爆升嘅效應減低,換言之,外賣盈利增幅會放慢,未來要靠酒店旅遊業務復蘇去推動收入同盈利高增長。

第三季、第四季收入按大行預測係334.06億人幣同360.67億人幣計(按年增幅分別21%及28%),當佢繼續收入勝預期,平均收入增長三成,撐住今年市銷率11倍,相比其他美國網絡增長股,收入增長較低而市銷率亦較低,仍不遜色,但現價實在已非強推之選。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner