【操盤手札記】搬倉避險造就破頂 - 割柑人

更新時間 (HKT): 2020.08.25 02:00
■喺憧憬資金回流下,阿里股價破頂,大行目標價普遍睇300元以上。資料圖片

年初肺疫爆發至今,政府成日講話14日關鍵期,14日又14日,剩返9個14日就到2021年!政府抗疫不力,港人惟有自救。對投資者嚟講,最怕嘅除咗微信女畀個冧巴你,仲有張竹君畀個冧巴你!

講到自救,中國嘅「內循環」經濟戰略,亦含自力更生意味。中國外憂中美脫鈎,內患澇疫結合,以內循環應對,側重安全先於效率。國家安全,包括國防、能源、糧食、公共衞生;而建立完整產業鏈,唔少得基礎建設,包括「兩新一重」——新基建、新城鎮、重大工程。

四大國安、三大基建係內循環根基,喺投資角度,呢七大領域嘅相關股份勢必受惠。兩新一重之中,新基建睇高一線,當中,涉及訊息同互聯網基建,如5G、物聯網、衞星、AI、雲計算、區塊鏈、大數據等,尤其龍頭股,更係投資組合必備。

有雲業務嘅電商龍頭阿里巴巴(9988),上周四公佈嘅季績好過預期,Non-GAAP多賺28%,電商收入增34%,雲收入增59%。不過市場最關注嘅,係中美角力下,繼TikTok、WeChat後,阿里雲會否成為制裁目標,管理層回應已採取新嘅合規措施。

市場對此早有戒心,據《彭博》講,為咗避開潛在嘅制裁同除牌風險,阿里幾個大投資者,包括淡馬錫等,已將價值幾十億美元嘅美國ADR搬倉轉換香港股票。事實上,由阿里上年11月尾來港掛牌至本月中,已有價值逾4,400億元嘅ADR搬嚟。

周一,喺憧憬資金回流下,阿里破頂,收264.4元,飆4.6%;大行目標普遍睇300元以上。阿里除咗受惠內循環、業績靚、股東搬倉,仲有三大動力,就係晉身藍籌、螞蟻上市、科技指數ETF蓄勢登場。

割柑人

關心你飯碗,貼近你生活,即Like「蘋果ATM」FB專頁!
BannerBanner