【笑到最後】信鄧小平買台積電(高明)

更新時間 (HKT): 2020.08.30 16:21
高明指,台積電是台灣經濟起飛概念的替代股,會持有到2024年至檢討。圖為台積電產品。

道指重返今年頭水平,升破今年高位只係時間問題,三大指數都升穿年份個頂,百份百確認熊市結束,好多人會問:啲股升到咁高,買又驚高追,唔買又驚走甩咗都唔知點好?

唯一可以解決嘅方法就係買入一啲有理念支持嘅資產,令你完全忘記所有估值、技術分析等等會騷擾你持貨嘅理據。

咁近排有啲咩理念值得支持呢?全球最大嘅課題就係同美國嘅關係,喺呢個課題上了解得最深嘅人首推鄧小平,佢曾經講過:凡與美國搞好關係的國家,都富起來。

由早前美國衞生部長訪台,到近日台灣開放美牛美豬入口,台灣嘅發展逐漸印證鄧小平嘅說話,相對以前台灣近乎靠內循環,未來幾年肯定有大量美歐嘅訂單湧入去,情況就好似改革開放後嘅中國,唔同嘅係科技水平。

至於要買啲咩?年頭高明見台灣形勢唔錯買咗一隻台股ETF,最後升都係靠佔組合28%嘅台積電,而升幅亦不如後者,索性直接換馬台積電,因為台灣企業中,台積電名氣最大。

台積電近期先後因為1. 蘋果設計晶片搵佢做代工;2. AMD市佔率增長,有指提前預訂明年台積電7納米及5納米晶片產能;3. Intel 7納米生產要延期,宣佈外判生產晶片成為選項,為台積電帶嚟新生意機會;4. 台積電宣佈計劃設廠研發2納米晶片,純粹鬥細已經係世界第一,當然台積電係代工廠,設計都係由蘋果、AMD、Intel等廠去負責。

競爭對手例如三星,自己本身有消費產品,做代工會有輕微利益衝突,令台積電會較著數。近月美國科技股狂升,唔係低B一句「2000年科網股翻版」,上升係因為技術登峰造極嘅資產有稀少性,相對濫印嘅鈔票,寧願要偉大企業嘅股票,而今次計返實質(Real)其實冇乜點升。

最後,大家可能會話,上述因素你知、我知、成個市場都知,一早反映晒啦,仲點升?高明咪話咗理念囉!相信鄧小平,親美會發達!台積電係台灣經濟起飛概念嘅替代股,冇目標價,持有到2024年至檢討。

高明

(證監持牌人,持有蘋果、台積電)

-----------------------------

【全球樓行】 Dream House零距離

屬於香港人的移民攻略

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

《本土情味》結集《飲食男女》雜誌經典欄目「老字號」文章,記錄香港40家飲食老店的動人故事,見證香港飲食史的甜酸苦辣。即日起,於各大便利店及書報攤有售,並於 《蘋果日報》你的優惠 網上獨家發售!

關心你飯碗,貼近你生活,即Like「蘋果ATM」FB專頁!
BannerBanner