【智取大市】侵侵9月力谷舊經濟 - 晉佳

更新時間 (HKT): 2020.08.31 02:00
■美國大選在即,如何製造舊經濟喺疫情之中復蘇嘅預期,對於特朗普爭取連任非常重要。 資料圖片

新經濟股之中,連蔚來都炒完第二浪升勢,納指超買亦去到臨界點,資金回流舊經濟股屬合理。

美國大選在即,特朗普要喺劣勢之中爭取選票,單靠炒高新經濟股形成大牛市似乎未夠,由於大部份選民身處舊經濟行業之中,如何製造舊經濟喺疫情之中復蘇嘅預期,對於特朗普爭取連任非常重要,喺跟住落嚟9月份以政策力谷舊經濟誘因相當大。

港美舊經濟股上周五強勢,美國航空股同郵輪股普遍沿5天線反彈,少有突破保歷加上軸上升或喺中軸錄得支持而向上,係繼6月大反彈後首次轉強。舊經濟股近日翻生,主要原因係聯儲局調整通脹目標,容許美國通脹一段時間高於2%,效果係令零息維持更長時間,甚至增加量寬、救市籌碼,對舊經濟股較利好,相信只係第一步。踏入9月份,利好疫情受累股嘅潛在因素,亦包括疫苗消息、民主共和兩黨新一輪美國救市措施達成協議嘅消息。

美國嘅航空股同郵輪股第一季大跌,其後成交大增,最誇張係AAL曾經兩日成交已達市值水平,轉手率超高,同時淡倉達到已發行股本三成,兩大郵輪股RCL同CCL情況相似但冇AAL咁誇,但仍然投機味極濃。換言之,只要有一日出現形成單邊升市嘅利好消息,就可以快速挾淡倉。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner