【智取大市】光伏強股博第二浪 - 晉佳

更新時間 (HKT): 2020.09.02 02:00
■福萊特董事長阮洪良。 資料圖片

Tesla固然勁到爆炸,事實上,美國嘅新舊經濟股,近排似係炒作梅花間竹,未至於好似先前咁,資金一面倒爆買新經濟股嘅情況。

隨住11月初嘅美國總統大選越嚟越近,特朗普為爭取選票,刺激舊經濟同就業相信成為佢9月嘅一項重要部署,疫情受累嘅旅遊相關股喺今個月相信唔會太差。

港股同美股情況相若,升勢更集中一小撮股,冇小米(1810)、港視(1137),近排難贏大錢。

Tesla爆升後,比亞迪(1211)同準備A股上市嘅吉利汽車(175)亦揩到新能源車嘅浪潮,前者噚日更單日急升13.8%,後者亦升4.4%。

受資金歡迎嘅股份之中,仲有光伏玻璃股再發力,信義光能(968)一路破頂,福萊特(6865)經過近一個月整固,一記大陽燭就重上高位附近,升勢更喺噚日下晝先有大成交配合下起動,後市似會繼續破頂。

今年上半年縱有疫情,福萊特收入仍升22.7%,純利大升76%。唔少光伏項目為咗喺今年第二季完結前追返2019年未完成部份,刺激第二季需求大升。不過,行業需求似乎喺下半年持續,光伏玻璃8月價格再升7至13%,原材料多晶硅價格更加供不應求。

行業形勢繼續支持福萊特,既然股價出現第一棍,以近期港股玩法,呢類受歡迎股份可以強者越強。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner