【智取大市】大選前得分策略 - 晉佳

更新時間 (HKT): 2020.09.07 02:00
■特朗普要靠經濟政策爭選票,美國舊經濟股慢升其實更坐得過。 資料圖片

上周美股大跌市預咗遲早會嚟。蘋果3日高位跌最多近兩成,相比2018年2月、10月同埋今年2月,今次嘅下跌同低位反彈速度遠遠誇張得多。周五蘋果嗰支超長錘頭,未能夠確認利好,波幅大,又快上快落到咁,大家應該以小時圖去觀察股價走勢,日線圖意義不大。

美股高波幅持續反而不利破頂,因為每次強力反彈至較接近上周高位,例如蘋果上返130美金左右,投資者都可能視為稍瞬即逝嘅沽貨時機,都會引嚟下一輪沽壓。倘若繼續保持高波幅,股價快速破頂嘅難度比快速破底高得多,要博反彈嘅話,都要選擇一個贏面較大嘅價錢先進場,明顯破周五低位先考慮。就當蘋果由高位跌三成,都只係去返季度業績前高位96美金水平,以3日可以最多跌兩成嘅波幅計,一場大震盪,或作為跌浪頭一波,由高位跌三成其實唔過份。

聯儲局絕對唔會容許市場出現3月時嘅危機,大家預咗佢隨時增加M2供應。螞蟻集團選擇稍後招股,照計唔會死錯人,10月應該係風平浪靜嘅時間,至少到時市場仍對新經濟股有信心。暫時估計,先跌後回穩,係大選前嘅主調,特朗普要靠經濟政策爭選票,美國舊經濟股慢升其實更坐得過,比博蘋果反彈,更易取分。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner