【操盤手札記】新舊經濟又交替 - 割柑人

更新時間 (HKT): 2020.09.08 02:19
■隨着疫情逐漸受控,加上假期臨近,消費意欲回升,舊經濟股回暖。領展喺本地消費市場有較大接觸面,可望跑贏同業。 資料圖片

上周,中港股市以至美股相繼轉弱,當中,美股更見拋售潮,尤其科技股,究竟係累積升幅過大出現技術性調整,抑或係出現「明斯基時刻」(Minsky moment),即資產價格因過度投機而致「價崩」?美股會唔會冧,除咗睇係咪炒過龍,仲要睇聯儲局取態,若果持續放水,則冇咁快冧市。

此外,上周有兩單地緣政治事件,亦要注意風險。其一,中印邊界再爆衝突,印度加碼封殺中國App;其二,德國繼法國後推出印太戰略,中歐關係轉向。喺中美科技戰惡化,中芯(981)可能步華為、中興(763)後塵被美國列入貿易黑名單之際,印度再禁118款中國App,而美加澳紐日印英法意又已相繼排除華為5G設備,中國科技嘅軟硬件喺海外接連失利。

周一,中港股市分別再跌1.9%同0.4%,恒指納入阿里巴巴(9988)、小米(1810)、藥明生物(2269)生效,但喺科技戰陰霾下,科技股繼續捱沽。恒指收24589,喺100天線爭持,下一支持位睇今輪升浪回調黃金比率50%,約24000水平。雖然肺疫造就宅經濟,但隨着疫情逐漸受控,加上中秋、國慶假期臨近,消費意欲回升,舊經濟股亦回暖。

領展(823)上周三升破3月高位引伸嘅下降軌阻力,隨後兩日企於阻力線上,確認突破。美銀睇好領展喺本地消費市場有較大接觸面,大摩亦指7月超市零售銷售按年增26.5%,而領展有35%租金收入嚟自超市同街市,另有28%嚟自餐飲,係收租股中比重最高,可望跑贏同業。此外,海外收購亦成業務動力,加上本月重啟回購,有助支持股價。

割柑人

關心你飯碗,貼近你生活,即Like「蘋果ATM」FB專頁!
BannerBanner