【笑到最後】蘋果華為的大日子 - 高明

更新時間 (HKT): 2020.09.14 02:00
■美國政府禁止全球採用美國生產技術晶片供貨予華為,禁令明日生效。資料圖片

即將來臨嘅9月15日,可能見證下年的一大投資主題:內循環。中美手機兩個宿敵:蘋果(AAPL)同華為都好大機會應用自主研發嘅晶片。

蘋果9月15日舉行發佈會,除咗慣性期待嘅iPhone 12之外,外間傳言得好勁,今次公佈嘅產品陣容會好強勁,包括利用自主研發晶片嘅MacBook都可能喺今次一齊公佈。

至於華為,美國政府禁止全球採用美國生產技術晶片供貨予華為,咁蹺禁令又係9月15日生效(TikTok強制賣盤又係呢日),有傳華為包機從台灣運送晶片回國,預計夠用到出年3月,同時華為出年OS冇得用Andriod。日經報道,中芯(981)嘗試今年底唔用美國設備情況下生產40納米晶片,三年後生產28納米晶片。中芯喺2011年已成功驗證40納米晶片,走回頭路或者係因供應晶片畀華為。

牌面上嘅內循環趨勢大致上係咁,對明年投資有乜啟示?

1. 中芯為咗拯救華為不惜將技術倒退返十年前,傾盡全國之力維持華為運作。不難想像為咗保持華為銷量,國內內循環只可買國產機。

2. 潮流興復刻版,任天堂出復刻版紅白機,市場一樣受落,萬一出年缺晶片,大可出復刻版,配合第一點,喺國內一樣可以銷量第一。

3. 晶片買爆用到出年3月,最樂觀情況拜登上台,連帶取消貿易戰可以任買,中芯就未必咁幫到手。

4. 經濟圈都行內循環,蘋果發佈會可能要倒退到喬布斯年代,公佈新機時冇得賣去中國。

5. 會唔會影響到蘋果賣去中國嘅銷量?咁就視乎華為嘅復刻機賣成點,銷量好,隻眼開隻眼閉任由先達經華強北路轉賣;銷量差矛頭一定直指蘋果,一旦報復,早兩個禮拜嗰種科技股跌幅,只不過係前菜。

(證監持牌人,持有蘋果。)

高明

fb.com/bigricetea

關心你飯碗,貼近你生活,即Like「蘋果ATM」FB專頁!
BannerBanner