【操盤手札記】運送疫苗大茶飯 - 割柑人

更新時間 (HKT): 2020.09.15 02:00
■多國研發疫苗,預計最快年底開始運送全球,估計需動用8,000架次巨無霸貨機。國泰能否把握機遇呢? 資料圖片

9月15日,美國總統特朗普打出嘅兩張「中國牌」—華為禁令、TikTok禁令,同日生效。截至上周五消息,特朗普拒絕延後死線。市場關注美國會否再對中國科技企業出招,戰線又會否擴至其他層面。

周一,中美關係仍困擾大市,惟科技股回勇,恒指收24640,升0.6%,受制100天線。恒指前周五跌穿由3月低位21139延伸嘅上升軌,如今重返24600關,但上升軌已延伸至近25000關,變成短期反彈阻力,要能重返其上,方能扭轉弱勢。

上周五,國泰(293)宣佈,國泰航空同國泰港龍唔會申請第二輪「保就業」計劃,變相預告裁員。管理層話第四季提交重組方案,意味最快10月炒人。員工WhatsApp群組早已流傳有機9月收信,10月離職。為免被炒,員工宜掖尿片做嘢,學火眼實驗室啲內地檢測員咁敬業!

上月中,國泰傳出裁員三分一節流。翻查本港第一輪「保就業」計劃資料,國泰僱員17,703人,港龍僱員2,581人,以此推算,大約裁員6,000人。主席賀以禮上月喺業績會講過,即使資本重組後獲得390億元,現時每月仍燒錢15億元。國泰本來上年中期同全年都扭虧為盈,點知今年被肺疫打殘。

剛公佈嘅8月數據,客運按年跌98.8%,貨運按年跌36.7%;值得注意嘅係,貨運運載率升14.2個百分點。礙於利用客機腹艙載貨運力大減,集團已改裝部份波音777-300ER客機載貨。機管局嘅8月數據亦顯示,貨機起降量按年升21.5%。國泰改客機作貨機,不失為疫市生機。疫情之下多國研發疫苗,預計最快年底開始運送全球,IATA推算,以全球78億人每人一劑計,需動用8,000架次巨無霸貨機!國泰又能否把握機遇呢?

割柑人

關心你飯碗,貼近你生活,即Like「蘋果ATM」FB專頁!
BannerBanner