【智取大市】由冷門股變武肺概念 - 晉佳

更新時間 (HKT): 2020.09.16 02:00
■CryoPort主攻生科冷凍運輸解決方案,因為武肺疫苗運送概念,市場對佢嘅幻想空間大幅提升。 互聯網圖片

上期提及嘅CryoPort,主攻生科冷凍運輸解決方案。呢個世界有好多醫療實驗之類,抽取細胞後,都要有冷凍技術去儲存運送呢啲細胞。CryoPort就係做呢啲,係極專業行業嘅領導者,為幾百項臨床研究機構(CRO)嘅項目提供冷凍儲存運輸技術支援,擁有尖端技術專利同解決方案。

本來運送疫苗唔係難度極高,但今次武肺疫苗需要最短時間內運送最多疫苗去全世界唔同地方,要冇差池之下保持品質,變成極困難嘅任務,呢個上期已略為解釋。

CryoPort喺8月一連收購CrpoPDP同埋MVE,前者係同業,主攻歐亞市場,收購可以擴大CryoPort處理唔同溫度儲存運輸方案嘅能力,亦可以擴大歐亞市場。

至於黑石幫手促成收購MVE,就係擴大業務到生產冷凍設備,其中包括-80度儲存設備,估計適合儲存Moderna同輝瑞武肺疫苗之用,兩項收購都好有協同效應,CryoPort亦似乎因此加大涉足武肺疫苗概念。

收購前後,CryoPort股價由30美金左右,衝上最高60美金。歷史市銷率計超過50倍,但可見將來收入有潛力幾何級上升,股價圖亦變成潛力圖。

市值得22億美金嘅CryoPort,本來身處極細規模嘅行業,潛力有限,但係突然因為佢尖端嘅技術,有可能令佢跳升為下一間國家英雄級嘅企業,幻想空間大幅提升。不過,股份近年由極低估值升上嚟,小注較佳。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner