【冰說聰明】新股狂潮撲水艱難 - 青冰

更新時間 (HKT): 2020.09.17 02:00
■農夫山泉爆升後,今轉福祿、樂享及明源雲都繼續熱爆。

新股熱潮延續,上一轉有農夫山泉(9633)在暗盤倍升,之後兩隻細股濠江機電(1408)及科利(1455)更升到兩倍,所以今轉福祿(2101)、樂享互動(6988)及明源雲(909)繼續熱爆,尤其是隻明源雲,有新一代金手指高瓴做基石投資者,戰友們都磨拳擦掌,沽定貨套現去抽,點知不少劵商都好水緊,孖展額度有限,你有錢抽、但佢無錢借,平時大把有得你借的劵商,今次都要擠牙膏式放額度,甚至有經紀戰友同青冰講,佢哋公司本來同銀行傾好要幾多,最後銀行忽然關水喉,搞到佢哋要周圍撲水,非常狼狽。

股市來到第三季尾,在肺炎疫情及中美交惡兩大利淡夾擊下,科技股仍然一支獨秀,手執ATMX,相信今年要跑贏大市唔算難,因為恒指仲跌緊12%嘛,如果要求表現再好啲,今年就真係要靠抽新股喇。

3月環球股災後,率先跑出的新股係生化及物管股,當時新股市場氣氛明顯比大市優勝,新股超購過百倍,首日升三成,已令戰友興奮,可以幫補吓個倉位,夠買多幾塊膠布貼吓。之後6、7月個浸,特別多明星股,康基(9997)、海吉亞(6078)、思摩爾(6969)及歐康維視(1477),將大家的期望大幅推高,升五成都唔太滿意,最後歐康維視超購1,895倍,上市首日高開193%,令更多股民醒覺,原來抽新股咁好賺,平時唔抽的都走去抽,未用過孖展的亦孖埋一份,結果到農夫山泉招股時,共收到70萬份申請,比歐康維視的35萬,多咗一倍。

新股必賺神話何時會爆,暫時未知,有人更話螞蟻都未上點會爆吖,青冰只認為,爆之前應該繼續落力抽,保持賺頭蝕尾的策略,上市後有賺就食糊,尤其是首日倍升嗰啲,因為誠哥教落:「不會去賺最後一個銅板」,留啲水位畀人賺啦。

青冰

fb.com/chingbing888

關心你飯碗,貼近你生活,即Like「蘋果ATM」FB專頁!
BannerBanner