【智取大市】完美股票買唔落手 - 晉佳

更新時間 (HKT): 2020.09.18 02:00
■Snowflake首日上市勁升1.1倍,打算長線投資呢隻好股嘅話,或者過一段時間個價會更買得落手。互聯網截圖

焦點美國新股Snowflake首日上市勁升1.1倍,市值705億美元,以最近一年收入約4億美金計算嘅市銷率係175倍!

呢間2012年成立嘅雲端數據庫企業,只得3,117客戶,就可創造單季1.33億美金收入,願意每年畀1球嘅客戶由22個升到56個,加上上市令其知名度大增,未來一段日子肯定吸引好多商業客戶,過去收入按年增幅1.2倍,之後都會好高增長。從基本因素同營運數據去睇,的確係難以抗拒嘅一項好投資!問題係賣緊完美價。短期內基金掃貨會令股份需求偏高,當要買嘅基金都買完,其後需求減少,估計股價會由外太空回落至地球嘅藍色天空,想佢貼地啲似乎冇乜可能。打算長線投資呢隻好股嘅話,或者過一段時間個價會更買得落手。

股市霎時間出現資金流逆轉,美金彈、人民幣跌,美股跌、港股更加要跌。恒指從月線、周線圖睇,似一浪低於一浪嘅走勢,7月份挑戰月線保歷加中軸不果,證明指數反彈浪完結,目前似足3月大跌前走勢。不過,螞蟻集團招股同美國大選在即,似乎足夠撐住環球股市唔跌得太甘,相信ATMX以至美國大型科技股,中短期內Chok住整固機會較大,中短期快速破頂機會似乎較微。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner