笑到最後|TikTok模式成科技股救生艇(高明)

更新時間 (HKT): 2020.09.20 14:45
TikTok成立新的公司TikTok環球,甲骨文及沃爾瑪持股兩成。

中環中心放售,同TikTok環球賣盤有咩共通點?答案就係急放。

TikTok先被ban後再達成交易,成立新的公司TikTok環球,甲骨文(ORCL)持有12.5%,沃爾瑪(WMT)持有7.5%,字節跳動繼續揸8成。又因為字節跳動有4成係美國投資者持有,所以解讀為美國佔TikTok大股,成功自圓其說落到台。5名董事局成員入面有4個會係美國人,總算攞返個尾彩。

暫時排面計,沃爾瑪係最大贏家,即刻變成電子商貿。阿馬遜(AMZN)同Shopify(SHOP)今年升6成同1.26倍,沃爾瑪只升14%,明顯當佢普通傳統股看待,雖然都有網購,但有乜嘢好得過,一下子得到1億TikTok用戶。

大家都知道,TikTok係一個智力測驗,可以吸引某種特質嘅人去用,不論國籍同種族,呢種人都係大多數,與其話TikTok嘅AI演算法係咩國家高科技,不如欣賞背後貫徹落實「農村包圍城市」策略,幾十年前已經話畀你知點樣吸引群眾。沃爾瑪嘅商品混入TikTok賣,唔單止目標客戶年輕化,呢班人亦相信係各群體中最易sell嘅一群人,直接製造盈利。

至於甲骨文,文字上係「提供數據雲端安全服務」,用香港人明嘅說話,就係黨委,幫手睇場。未必有好大直接着數,但「信得過」三個字就寫咗喺品牌度。

未被白宮當目標看待前,TikTok估值據稱達500億美元,限定45日內要賣盤或倒閉後,市場傳出提出嘅收購估值大約100億至300億美元,冇計,急放冇乜條件講價。今次仲未披露交易金額,但估計都唔會特別貴價搶,擺明益美國企業。

中美冷戰,一旦反制,美資科技股會否失去中國市場?TikTok賣盤模式亦都確立救生艇計劃,如果失去中國市場,取而代之就係折讓價競購中資喺美國嘅資產,彌補市場損失,重返西方價值「上帝關了一度門,必然為你開一扇窗」。推斷落去,改名做WeCom嘅WeChat,被ban都唔係死路一條,肯平賣加安插黨委,有錢一樣可以齊齊搵,「只要守法毋須擔心」。

高明

https://www.facebook.com/bigricetea

-----------------------------

【全球樓行】 Dream House零距離

屬於香港人的移民攻略

-----------------------------

上車必讀天書 「九成按」入市懶人包

點擊即睇《按揭必讀手冊》電子書

----------------------------

支持蘋果深度報道,深入社區,踢爆權貴,即Like蘋果專題及調查組FB專頁

關心你飯碗,貼近你生活,即Like「蘋果ATM」FB專頁!
BannerBanner