【冰說聰明】東亞或追回跌幅 - 青冰

更新時間 (HKT): 2020.09.24 02:00
■相對於其他行家,東亞今年只跌9%,可說係慘勝。但失去憧憬後,東亞或追回跌幅。 資料圖片

滙控(005)一再破底,昔日被市場視為最穩健的收息之選,今年連宣佈咗派嘅息都收回,現在歐美覺得佢有份洗黑錢,內地認為佢應被列入「不可靠實體清單」,可謂兩面不是人,今年累跌53%,是藍籌股中最差。但其他行家亦不好過,渣打(2888)跌52%;曾被認為是月供必選的恒生(011),今年亦跌29%;中銀香港(2388)好少少,都要跌23%;當中跌得最少的本地銀行,是東亞(023),相信未必有太多人估到。

相對於其他行家,東亞今年只跌9%,可說係慘勝,東亞股價算係積弱多年,無論係早幾年炒加息周期,還是國內經濟好景,都係升得少跌得多,箇中原因係內地業務表現差勁,香港業務亦乏善足陳。去年國內業務就蝕了35億元,是2016年度後再次虧損,主因係幾筆內地商業房產貸款,要作減值撥備,因此拖累去年盈利急跌5成。

而今年大幅跑贏同業的原因,亦是國內業務相關。早在3月時,公司宣佈委託高盛,為集團的業務及資產組合進行全面檢討,並專注策略性交易,在6底前會有公佈,而經常狙擊東亞管理層的基金Elliott Management,都支持有關行動,當時對股價曾有短暫刺激,由17蚊炒上20蚊。及至5月底,東亞再發通告,話因受疫情影響,需要額外時間作評估,所以將延後至9月30日前公佈有關檢討。英國金融時報在該通告出街後幾日,爆料指東亞正就出售中港銀行業務,進行磋商,消息曝光後,東亞股價在一星期內,由低位14蚊抽升近四成。

噚日中午終於出咗通告,原來只是賣保險業務,睇返上半年,保險只係貢獻了兩億盈利,實在影響有限,而按通告所述,未來將優化國內銀行業務,換言之短期內未必會賣,失去憧憬後,今年大幅跑贏之勢,或將不再。

青冰

fb.com/chingbing888

關心你飯碗,貼近你生活,即Like「蘋果ATM」FB專頁!
BannerBanner