【智取大市】外強中乾民企救國 - 晉佳

更新時間 (HKT): 2020.09.25 02:00
■習近平推動民企統戰,某程度上係要求已經賺到盤滿缽滿嘅阿里及騰訊,出嚟均富一下。資料圖片

自從2018年開始,恒指形成浪比浪低嘅形態,以中長線走勢睇,最新呢個跌浪有可能跌破21139點嘅低位,要情況比3月好?形成長短腳見底訊號?牌面睇機會相對細。喺新經濟股轉弱、舊經濟股free-fall之下,要再出現顯著跌幅先能夠吸引資金進場大手撈低,22000點都未知夠唔夠吸引。

最新《中國褐色書》講到,中國除咗四大一線城市之外,其他地區復蘇進度緩慢,似乎更加凸顯中國經濟外強中乾嘅問題。舊經濟企業收入盈利喺疫情過後唔能夠快速反彈,推動唔到實體經濟表現,企業就唔能夠有資金回籠盡快減債,形成惡性循環,壞賬上升始終又係由內銀買單。習近平推動民企統戰,某程度上係要求已經賺到盤滿缽滿嘅阿里(9988)、騰訊(700),係時候出嚟均富一下。

《關於加強新時代民營經濟統戰工作的意見》裏面提到:「引導民營經濟人士增強自律意識,築牢思想道德防線,嚴格規範自身言行,培養健康生活情趣,塑造良好公眾形象。完善聯誼交友、談心交流制度,廣交深交摯友諍友」連私生活都要管?反映未來要對民營經濟人士揸得有幾緊了,一切嘅嘢亦開始喺股市反映出嚟。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner