【智取大市】恒大恐演變股市危機 - 晉佳

更新時間 (HKT): 2020.09.28 02:00
■上星期五恒大嘅境內債同境外債價分別下跌約兩成同一成,反映投資者對恒大信心已失。 資料圖片

恒大(3333)極力否認要求廣東省打救,但市場反正恐慌了。上星期五恒大嘅境內債同境外債價分別下跌約兩成同一成,呢個先係最大問題,比起股價急跌同埋傳聞報告本身嘅衝擊力更大。

境內債急跌,一方面證明許家印缺水維穩失敗,另一方面證明市場流動性比想像中緊張。以目前債價去睇,投資者對恒大信心已失,除非許家印霎時間有能力令債價回穩,或者中央迅速出手擺平,否則恒大將失去再融資能力,更有可能動搖住宅買家對恒大如期交樓嘅信心,影響銷售,越拖得耐,問題越冇可能由恒大獨力解決。

一間全國性大企業嘅巨型負債泡沫,必然要由中央出手,要孭起恒大巨債,要銀行各自承擔,又或者中央出錢拆掂佢,當中要為恒大提供幾千億嘅低息貸款,仲要限制恒大日後不能過度擴充,呢個已經假設恒大嘅賬目本身一啲水份都冇,你信,市場都未必信。

要留意嚟緊周一恒大債表現,再跌就會拖累港股同A股跌得更快。上星期五恒指跌得唔多,但個股跌勢頗為全面,假若中央冇快速回應事件,港股短期內可能變成要錢唔要貨。

睇返上周五美股反彈,但中概股都要逆市跌,睇嚟美股同港股短期內將會走背馳,港股可能要等下個特價時段出現,形成撈底機會先出手。

晉佳

fb.com/advanceguy1

關心你飯碗,貼近你生活,即Like「蘋果ATM」FB專頁!
BannerBanner